កាន់តែប្លែកទៀត! ថ្មីៗនេះ ស្ត្រីនៅបរទេសកំពុងផ្អើលនាំគ្នាយកឈាមរដូវមកធ្វើម៉ាសថែស្បែក ជាពិសេស ស្បែកមុខ ដើម្បីឱ្យស្បែកភ្លឺរលោង ក្មេងជាងវ័យ។ ជាក់ស្តែង តាមរយៈវីដេអូ Podcast របស់ស្ត្រី Influencers ៣ នាក់ ដែលជាអ្នកបង្កើតកម្មវិធី Mamamia ពួកគេបានលើកឡើងអំពី ការទទួលបានស្បែកស្អាត ដោយស្រ្តីគ្រាន់តែប្រើឈាមរដូវខ្លួនឯង លាបលើស្បែកមុខ ហើយទុកតែ ៣-៤ នាទី រួចលាងទឹកចេញជាការស្រេច។
ស្ត្រីជនជាតិអូស្ត្រាលីទាំង ៣ បានលើកឡើង ដោយផ្អែកតាមអត្ថបទកំពុងផ្ទុះមួយ ដែលចេញផ្សាយដោយគេហទំព័រ The Conversation។ នៅក្នុងអត្ថបទ គេបានចង្អុលបង្ហាញថា ការយកឈាមរដូវស្ត្រីមកធ្វើម៉ាសថែស្បែក វាអាចធ្វើឱ្យកោសិកាស្បែករស់ឡើងវិញ និង បន្ថែមឱ្យស្បែកមានសភាពភ្លឺរលោង ដោយសារឈាមរដូវផ្ទុកទៅដោយ កោសិកា stem cells, cytokines និង ប្រូតេអ៊ីន ជាច្រើន។
ដោយឡែក បើតាមការសិក្សាមួយ ដែលចេញផ្សាយដោយសហព័ន្ធសមាគមអាមេរិកសម្រាប់ជីវវិទ្យាពិសោធន៍ (Federation of American Societies for Experimental) គេបានរកឃើញថា ប្លាស្មា (Plasma) ដែលមានប្រភពមកពីសារធាតុរាវនៃឈាមរដូវ ពិតជាអាចជួយសម្រួលដល់ការជួសជុលជាលិកា និង ព្យាបាលរបួស។
លទ្ធផលនៃការពិសោធន៍ខាងលើ របួសដែលត្រូវបានព្យាបាលដោយប្លាស្មាឈាមរដូវ បានបង្ហាញពីការព្យាបាលបាន ១០០ % ក្នុងរយៈពេល ២៤ ម៉ោង ដែលខុសពីប្លាស្មាឈាមធម្មតា ព្យាបាលបានតែ ៤០ % ប៉ុណ្ណោះ។ អ្នកស្រាវជ្រាវជឿជាក់ថា បាតុភូតបែបនេះ វាត្រូវបានភ្ជាប់ទៅនឹងការបង្កើតឡើងវិញនៃប្រូតេអ៊ីន និង ម៉ូលេគុលជីវសកម្មនៅក្នុងសារធាតុរាវនៃឈាមរដូវ ដែលជំរុញឱ្យស្បូនធ្វើវាឡើងវិញជារៀងរាល់ខែ។
Stem cells ពីឈាមរដូវ ក៏ទទួលបានការចាប់អារម្មណ៍ពីអ្នកស្រាវជ្រាវជាច្រើន ហើយត្រូវបានបង្ហាញថា វាអាចបង្កើតការព្យាបាលស្បែកផ្សេងៗទៀតដូចជា៖ ជំរុញការផលិតខូឡាជិន, កាត់បន្ថយស្នាមជ្រីវជ្រួញ និង ជំរុញការជួសជុលកោសិកាដើម្បីលូតលាស់ផងដែរ។
ផ្ទុយគ្នានេះ បើប្រៀបធៀប Stem cells ពីឈាមរដូវ និង Stem cells យកពីឈាមធម្មតា អ្នកជំនាញមួយចំនួន មិនយល់ស្របចំពោះការប្រើ Stem cells ពីឈាមរដូវឡើយ ដោយហេតុ វាអាចផ្ទុកទៅដោយបាក់តេរី និង មេរោគផ្សិត រួមទាំងបាក់តេរី Staphylococcus aureus ដែលបង្កឱ្យឡើងបូស។ លើសពីនេះ វាអាចផ្ទុកមេរោគបង្កលើផ្លូវភេទ និង កាមរោគផ្សេងៗ។ ចុះសម្រាប់ប្រិយមិត្តវិញ យល់យ៉ាងណាដែរ? គួរសាកល្បងម្តងនឹងគេ ឬមួយក៏មិនបាច់ល្អជាង?៕
ប្រភព៖ NYP
