ដំណឹងមរណភាពដ៏ក្រៀមក្រំ កាលពីថ្ងៃទី ១៩ ខែវិច្ឆិកា ឆ្នាំ ២០២៥ កន្លងទៅ បានធ្វើឱ្យមហាជនអ្នកគាំទ្រលើបណ្ដាញសង្គម ជាពិសេសអ្នកក្នុងសិល្បៈជាច្រើនមានការសោកស្ដាយជាពន់ពេកចំពោះការបាត់បង់តារាសម្ដែងប្រុសលោក អ៊ុន សិទ្ធា ដែលបានទទួលមរណភាពដោយសារជំងឺដំបៅក្រពះ ពោះវៀនធ្ងន់ធ្ងរ និង ទឹកដក់ក្នុងពោះ។
ចំពោះការចាកចេញគ្មានថ្ងៃត្រឡប់របស់លោក អ៊ុន សិទ្ធា ហាក់ត្រឹមតែមួយប៉ប្រិចភ្នែក ខណៈលោកពុំធ្លាប់បង្ហាញពីស្ថានភាពជំងឺរបស់ខ្លួនម្ដងឡើយ ដែលបានបន្សល់ត្រឹមក្ដីអាល័យក្នុងចិត្តមហាជនអ្នកគាំទ្រ ជាពិសេសមិត្តរួមសិល្បៈជាច្រើន មានតែអារម្មណ៍ស្រណោះអាណិតចំពោះតារាសម្ដែងប្រុសរូបនេះ ដោយមិត្តស្និទ្ធស្នាលក្នុងសិល្បៈជាច្រើន កំពុងចែករំលែកនូវអនុស្សាវរីយ៍ក្នុងការចង់ចាំល្អៗជាមួយតារាប្រុសរូបនេះបន្តបន្ទាប់។
ទាក់ទងនឹងដំណឹងនៃការបាត់បង់ជីវិតដោយសារធ្លាក់ខ្លួនឈឺជំងឺច្រើនមុខ តែហាក់ដូចកើតឡើងមួយប៉ប្រិចភ្នែកនេះដែរ ក៏បានធ្វើឱ្យមហាជនអ្នកគាំទ្រនឹកអាល័យដល់សិល្បករមួយរូបទៀត ក៏ជាតារាសម្ដែង និង ជាម៉ូឌែលដ៏មានប្រជាប្រិយភាព គឺលោក ប៉ែន ចាន់សិទ្ធ ដែលបានបាត់បងជីវិតដោយសារជំងឺមហារីក រលាកសួត និង ក្រពះពោវៀន កាលពីថ្ងៃទី ៣ ខែមីនា ឆ្នាំ ២០២៥ កន្លងទៅ។
ចំពោះការលាចាកលោករបស់តារាប្រុស ២ រូបនេះ ត្រូវបានមហាជនលើបណ្ដាញសង្គមចាត់ទុកថា ជាការបាត់បង់ធនធានសិល្បករដ៏មានសមត្ថភាព និង មនុស្សល្អស្លូតបូតក្នុងសង្គម ព្រមទាំងមហាជននៅតែមានក្ដីអាណិតសោកស្ដាយមិនអស់ចិត្ត ព្រោះតារាប្រុសទាំង ២ រូបនេះ ត្រូវបានគេលើកឡើងថាព្រោះតែរក្សារកិត្តិយស និង ភាពថ្លៃថ្នូរ មិនចង់ឮពាក្យថាពេលតារាឈឺ គឺប្រកាសសុំជំនួយ ដោយសុខចិត្តសំងំឈឺស្ងាត់ៗមិនប្រាប់ឱ្យមហាជន ក៏ដូចជាមិត្តសិល្បៈបានដឹងឮរហូតដល់ថ្ងៃចាកចេញគ្មានថ្ងៃត្រឡប់ទាំងវ័យក្មេង៕
