កាលពីយប់ថ្ងៃទី ០២ ខែមករា ឆ្នាំ ២០២៤ កន្លងទៅ គ្រួសារលោកគ្រូប្រដាល់ អេ ភូថង និង កីឡាការិនីប្រដាលគុនខ្មែរ អេ យ៉ានុត មានទុក្ខធំយ៉ាងខ្លាំង ដោយលោក លៀង ប៉ហេង ស្វាមី អេ យ៉ានុត បានទទួលមរណភាពដោយជំងឺមហារីកពោះវៀន។
ក្នុងនោះ ដំណឹងខាងលើបានធ្វើឱ្យមហាជនចូលរួមរំលែកទុក្ខ និង ស្រណោះដល់កីឡាការិនីប្រដាលគុនខ្មែរ អេ យ៉ានុត យ៉ាងខ្លាំង ដោយខំប្រឹងតស៊ូ មើលថែ ព្យាបាលស្វាមីទាំងក្នុង និង ក្រៅប្រទេស តែមច្ចុរាជមិនប្រណីនៅតាមពង្រាត់អ្នកទាំង ២ ចាកឆ្ងាយគ្នាគ្មានអាល័យ។
ដោយឡែកនៅព្រឹកថ្ងៃទី ៤ ខែមករា ឆ្នាំ ២០២៤ នេះដែរ ពិធីបញ្ចុះសពលោក លៀង ប៉ហេង ស្វាមីកីឡាការិនីប្រដាលគុនខ្មែរ អេ យ៉ានុត បាន និង កំពុងរៀបចំទៅតាមប្រពៃណីដែរ។
ម្យ៉ាងវិញទៀត ស្របពេលពិធីបុណ្យសពកំពុងរៀបចំ មហាជនស្រណោះយ៉ាងខ្លាំង ក្រោយកីឡាការិនីប្រដាលគុនខ្មែរ អេ យ៉ានុត បានបង្ហោះសារយ៉ាងអាល័យក្នុងនាមជាស្ត្រីមេម៉ាយត្រូវមើលថែកូនប្រុសតែម្នាក់ឯងចាប់ពីពេលនេះទៅថា៖ «ម៉ាក់នឹងតស៊ូ ដើម្បីកូនប្រុសរបស់ម៉ាក់»។
គួររំឭកថា កីឡាការិនីប្រដាល់គុនខ្មែរ អេ យ៉ានុត និង ស្វាមី គឺលោក លៀង ប៉ហេង ជាមន្ត្រីនគរបាល បានភ្ជាប់ពាក្យនៅថ្ងៃទី ៩ ខែកក្កដា ឆ្នាំ ២០២០ និង រួមរស់ជាមួយគ្នាទទួលបានចំណងដៃរកូនប្រុសមួយ រហូតនៅថ្ងៃទី ០៤ ខែមីនា ឆ្នាំ ២០២៤ បានដឹកដៃគ្នាចូលរោងការតាមប្រពៃណី ក្រោយកីឡាការិនីប្រដាល់គុនខ្មែរ អេ យ៉ានុត បញ្ចប់បេសកម្មនមួយចំនួនក្នុងវិស័យកីឡាប្រដាល់គុនខ្មែរ៕
