នៅថ្ងៃទី ២៩ ខែធ្នូ ឆ្នាំ ២០២៤ ស្នងការដ្ឋាននគរបាលខេត្តកំពង់ស្ពឺ បានជូនដំណឹងពីករណីរថយន្តក្រុងបានរេចង្កូតធ្លាក់ផ្លូវរួចបានរេទៅអែបជ្រោះ និង បានបុកដើមឈើចំណុចលោកយាយបាំងដៃ ហួសចំណុចជ្រោះអូរកសេះ ក្នុងភូមិសាស្រ្តស្រុកភ្នំស្រួច ឃុំចំបក់ លើខ្នងភ្នំឧទ្យានជាតិព្រះកុសុមៈ។
ទាក់ទិនទៅនឹងករណីនេះ តាមការបញ្ជាក់ពីលោកវរសេនីយ៍ទោ ជុន ចន្ទដេត អធិការនគរបាលស្រុកភ្នំស្រួច បានឱ្យដឹងថា ក្នុងរថយន្ដមានមនុស្សប្រមាណ ៦៨ នាក់ ស្រី ៤៣ នាក់ មានកូនសិស្សសាលា និង លោកគ្រូ អ្នកគ្រូ ដែលមកពីវិទ្យាល័យល្វា ស្រុកព្រៃឈរ ខេត្តកំពង់ចាម។ ចំពោះករណីគ្រោះថ្នាក់នេះ មិនធ្វើឱ្យប៉ះពាល់ដល់អាយុជីវិតមនុស្ស ប៉ុន្តែរងរបួសស្រាលធ្ងន់ ចំនួន ០២ នាក់ គឺអ្នកបើកបរ និងព្រូរថយន្ត។
ស្នងការដ្ឋាននគរបាលខេត្តកំពង់ស្ពឺ បានបញ្ជាក់ឱ្យដឹងថា មូលហេតុដែលបង្កជាគ្រោះថ្នាក់គឺ រថយន្តពេលធ្វើដំណើរចុះពីលើភ្នំគីរីរម្យ មកដល់ចំណុចខាងលើ រថយន្ដមានបញ្ហាហ្រ្វាំងជាន់មិនជាប់ រួចអ្នកបើកបរបានព្យាយាមបុកលេខដើម្បីទប់ល្បឿន ចៃដន្យបានរេចង្កូតទៅផ្នែកម្ខាងផ្លូវ រួចបានបុកដើមឈើទើបទប់ជាប់។ ក្រោយកើតហេតុលោកគ្រូ អ្នកគ្រូ និង សិស្ស ត្រូវបានជួយសង្រ្គោះដោយអាជ្ញាធរ និង សមត្ថកិច្ចនគរបាល ដល់ផ្នែកខាងក្រោមជើងភ្នំ នៅឃុំត្រែងត្រយឹង ដោយសុខសុវត្ថិភាព៕
