«ឱ! ខេត្តសៀមរាបប្រៀបឋានឱសថ កាលខ្ញុំប្រតិព័ទ្ធផ្កាបាត់ដំបង ដកចិត្តពុំរួចគួចគិតគេងផ្សង តែបាត់ដំបងប៉ងស្ម័គ្រចម្ប៉ា…» រាល់ពេលបានឮឃ្លាផ្តើមចម្រៀងនេះភ្លាម អ្នកសណ្តាប់ទាំងឡាយ តែងពុះកញ្ជ្រោលអារម្មណ៍ ហាក់ចង់ហោះហើរទៅដល់ទឹកដីសៀមរាបឱ្យបានឆាប់រហ័ស។
ពិតណាស់! មន្តស្នេហ៍សំនៀងនៃបទ «ចំប៉ីសៀមរាប» នេះ ពិតជាបានអង្រួនខ្ញុំអន្ទះសា ស្ម័គ្រធ្វើដំណើររយគីឡូម៉ែត្រ ឆ្ពោះទៅដល់ខេត្តសៀមរាបត្រឹមមួយប៉ប្រិចភ្នែក។ ប្រាសាទនានានៅតែជាទីជាប់ចិត្ត តែអ្វីដែលធ្វើឱ្យល្ហែល្ហើយចិត្តទៀតនោះ គឺដំណើរកម្សាន្តលើកនេះ ខ្ញុំបានទទួលបទពិសោធសម្រាកលម្ហែនៅកន្លែងឯកជនមួយ ជាផ្ទះវីឡាទំនើប ទើបរះថ្មី ស្ថិតនៅបង្កើយនឹងក្រុងសៀមរាប នោះគឺ ALMaha Villa។
ចេញពីតំបន់ ផាប់ស្ទ្រីត ធ្វើដំណើរប្រហែល ១០ នាទី យើងបានមកដល់ទីតាំងស្នាក់ ALMaha Villa ដែលកំពុងតែបង្អួតសម្រស់យ៉ាងប៉ប្រិម ចោមព័ទ្ធទៅដោយវាលស្រែខៀវខ្ចី ជាដំណាំភូមិផងរបងក្បែរនោះ។ រំកិលសន្សឹមៗដល់ច្រកចូល យើងទទួលបានការស្វាគមន៍ពីបុគ្គលិកប្រមាណ ៤-៥ នាក់ ជាមួយស្នាមញញឹម និង ភាពរួសរាយរាក់ទាក់។
ក្រឡេកពីក្រៅ ផ្ទះវីឡាហាក់ដូចតូចទាប តែចូលដល់ក្នុង ទីធ្លាធំទូលាយ រីឯវីឡាសំកាំងពេញភ្នែក ជាពិសេសពីជ្រុងមួយទៅជ្រុងមួយ មានតាក់តែងទៅដោយគ្រឿងលម្អសិល្បៈ ដែលស្មានសន្មតជាការលាយបញ្ចូលគ្នារវាងវប្បធម៌ខ្មែរផង និង បស្ចិមប្រទេសផង។
បើតាមការរៀបរាប់ពីម្ចាស់វីឡាផ្ទាល់ គឺលោកស្រី សំ រ៉ានី ដែលគេស្គាល់ថាជាអ្នកច្នៃម៉ូដគ្រឿងអលង្ការបែបសិល្បៈ និង ជាស្ថាបនិកគ្រឿងអលង្ការធ្វើដោយដៃ Graines de Cambodge ការរៀបចំគំនិត ឬ concept នៃវីឡានេះ គឺបានចាក់ឫសជ្រៅទៅនឹងការអបអរវប្បធម៌ និង បេតិកភណ្ឌខ្មែរ ហើយក៏រួមឆ្លុះបញ្ចាំងពីវប្បធម៌អារ៉ាប់ ជាបទពិសោធដែលលោកស្រីទទួលបានពេលកំពុងរស់នៅទីនោះ។
ការរចនាវីឡានេះ លោកស្រីបានធ្វើការផ្ទាល់ជាមួយបុគ្គលមានទេពកោសល្យនៅកម្ពុជា រាប់តាំងពីស្ថាបត្យករ អ្នកច្នៃម៉ូដ រហូតដល់សិប្បករ ដើម្បីបង្កើតកន្លែងស្នាក់មួយ បង្ហាញពីភាពសម្បូរបែបនៃសិល្បៈហត្ថកម្ម និង សម្រស់របស់ប្រទេសយើង។
ជាអ្នកច្នៃម៉ូដផងនោះ លោកស្រីបានដាក់បេះដូងក្នុងការរចនាគ្រឿងលម្អខាងក្នុងដោយផ្ទាល់ដៃ។ លោកស្រីបានលាយបញ្ចូលគ្នានូវធាតុប្រពៃណីខ្មែរ និង គ្រឿងតុបតែង ដែលបង្ហាញពីអត្តសញ្ញាណវប្បធម៌ដ៏ល្អឯករបស់កម្ពុជា។ ដូចបានឃើញជាក់ស្តែង ទាំងខាងក្នុង និង ខាងក្រៅ រួមទាំងបន្ទប់ស្នាក់ចំនួន ៥ គ្រប់ជ្រុងទាំងអស់ សុទ្ធតែរៀបចំយ៉ាងឥតខ្ចោះ ប្រកបដោយគំនិតសិល្បៈ ផ្តល់ជាអារម្មណ៍ប្លែកផង លម្ហែផង ហើយក៏បង្កើតជាប្លង់ផ្តិតយករូបភាពបង្ហាញពី Lifestyle ឡូយឆាយមួយបែបផងដែរ។
ជាផ្ទះវីឡាលម្ហែ ALMaha Villa ស័ក្តិសមបំផុតសម្រាប់ការជួបជុំលក្ខណៈគ្រួសារ ឬ មិត្តភក្តិ ពី ១០ ទៅ ១៥ នាក់។ ទីនេះមានភ្ជាប់មកជាមួយផ្ទះបាយ បារ អាងហែលទឹក កន្លែងអាំងសាច់ និង ទីធ្លាធំទូលាយ អំណោយផលបំផុតសម្រាប់ការជួបជុំជប់លៀង ឬ ពិសាអាហារជុំគ្នា បន្ទាប់ពីដើរកម្សាន្តហត់នឿយនៅតាមប្រាសាទនានា។
បទពិសោធស្នាក់នៅ ២ យប់ ៣ ថ្ងៃ យើងទទួលការយកចិត្តទុកដាក់យ៉ាងកក់ក្តៅពីបុគ្គលិក ALMaha Villa ដែលធ្វើឱ្យដំណើរកម្សាន្តលើកនេះ ពិតជារីករាយ មានន័យ បន្ថែមជាអនុស្សាវរីយ៍មួយទៀតមិនអាចបំភ្លេចបាន។
រីករាយភ្លេចខ្លួន ពេលវេលាបីដូចលឿនរហ័ស សូម្បីចាកឆ្ងាយមួយជំហាន ក៏មិនចង់ឃ្លាតសោះឡើយ ឬ អាចថាត្រូវមន្តស្នេហ៍ទីនេះតែម្តង។ ដូចទៅនឹងសំនៀងមួយឃ្លាចុងក្រោយនៃបទ «ចំប៉ីសៀមរាប» ដែលអធិរាជសំឡេងមាសបង្ហើរដូច្នេះថា ៖ «ពេលនេះចំប៉ីសៀមរាបបងអើយ មានតែអ្នកហើយដែលលោកតម្រូវ ជួយផងគ្រាន់ឱ្យបងបានរស់នៅ ជាគ្នាតទៅនឹងចំប៉ីអើយ…»៕
