អ្នកកីឡាកាសជើងចាស់ដ៏ល្បី Rey Misterio Sr. ដែលត្រូវជាពូបង្កើតកំពូលអ្នកកីឡាកាស WWE លោក Rey Misterio Jr. បានទទួលមរណភាពហើយក្នុងវ័យ ៦៦ ឆ្នាំ នេះបើតាមការចេញផ្សាយរបស់សារព័ត៌មាន News18 ដោយស្រង់ប្រភពពីក្រុមគ្រួសាររបស់លោក។ ដំណឹងមរណភាពរបស់អ្នកកីឡាកាសរូបនេះដែរត្រូវបានប្រកាសក្រោយឪពុករបស់លោក Roberto Gutierrez បានលាចាកលោកកាលពីខែមុនប៉ុណ្ណោះ។
គួរឱ្យដឹងថា អ្នកកីឡាកាសសញ្ជាតិម៉ិកស៊ិកដែលមានឈ្មោះពិតថា Miguel Angel Lopez Dias រូបនេះ បានសម្រេចចិត្តដាក់ឈ្មោះលើសង្វៀនថា Rey Mysterio Sr. គឺដើម្បីកុំឱ្យមានអ្នកយល់ច្រឡំថារូបលោកជាក្មួយប្រុសដែលជាអ្នកកីឡាកាសដ៏ល្បី Rey Mysterio Jr.។ លើសពីនេះ លោកក៏ត្រូវជាឪពុកមារបស់អ្នកកីឡាកាស WWE លោក Dominik Mysterio ផងដែរ។
Rey Mysterio Sr. បានចូលប្រឡូកវិស័យកីឡាកាសតាំងពីឆ្នាំ ១៩៧៦ ដោយលោកបានចូលប្រកួតលើសង្វ្រៀនជាច្រើនរួមមាន Pro Wrestling Revolution, Tijuana Wrestling និង World Wrestling Association (WWA) ជាដើម។ បន្ថែមពីនេះ លោកក៏ធ្លាប់ចាប់ដៃគ្នាជាមួយក្មួយប្រុស Rey Mysterio Jr. ប្រកួតយកឈ្នះ WWA Tag Team Championship ផងដែរ៕
ប្រភព៖ Hindustan Times
