ជាការពិតណាស់ អ្នកគាំទ្រនិយមតាមដានពីជីវិតការងារសិល្បៈរបស់ ឌីជេ ក្តិប ច្បាស់ជាបានជ្រាបហើយថា បន្ទាប់ពីវិលត្រឡប់មកកាន់សិល្បៈជាថ្មីរយៈពេលចុងក្រោយនេះ លោកកាន់តែទទួលបានប្រជាប្រិយភាព និង មានទីផ្សារការងារសិល្បៈជាហូរហែ។
លើសពីនោះ អ្វីដែលកាន់តែពិសេស កាលពីពេលថ្មីៗនេះ ឌីជេ ក្តិប ក៏បានបង្ហាញវត្តមានក្នុងការប្រគំតន្ត្រីទោលរបស់កំពូលតារាចម្រៀងរ៉េប វណ្ណដា «ត្រីវិស័យ មាស» នៅឯខេត្តបាត់ដំបងទៀតផង។
ក្នុងនោះដែរ អ្នកគាំទ្របានចាប់អារម្មណ៍ថា តារាចម្រៀងរ៉េបរៀមច្បង ឌីជេ ក្តិប តែងតែកោតសរសើរដល់សិស្សប្អូន គឺតារាចម្រៀងរ៉េប វណ្ណដា មិនដាច់ពីមាត់ តាំងពីមុនលោកមិនទាន់បានសម្តែង និង ក្រោយការឡើងសម្តែងលើឆាកប្រគំតន្ត្រីជាមួយគ្នា។
ជាក់ស្តែង ថ្មីៗនេះ ឌីជេ ក្តិប បានបង្ហោះសារសរសើរមិនដាច់ពីមាត់ដល់ វណ្ណដា ជាថ្មីថា៖ «ក្នុងបេះដូងបង ប្អូន គឺជាគ្រាប់ពេជ្រ ១ គ្រាប់របស់ប្រទេសកម្ពុជា ដែលពិតជាបានពាំនាំនូវតន្រ្តី និង វប្បធម៌ខ្មែរឡើងទៅលើឆាកអន្តរជាតិឱ្យបរទេសគេកាន់តែស្គាល់ខ្មែរ កាន់តែច្បាស់បន្ទាប់ពី យុគសម័យតន្ត្រីមាសរបស់លោកគ្រូអ្នកគ្រូ ដែលជាកវីតន្រ្តីករ អ្នកនិពន្ធ ក៏ដូចជាអ្នកចម្រៀងរួមជំនាន់ជាមួយនឹងលោកគ្រូអធិរាជសំឡេងមាស ស៊ិន ស៊ីសាមុត យ៉ាងពិតប្រាកដ ១០០%។ ក្នុងនាមបង ជាក្មេងស្រលាញ់ការតែងនិពន្ធ ១ រូប សូមគោរព កោតសរសើរប្អូនដោយក្ដីគោរពស្រលាញ់។ ហើយសូមជូនពរឱ្យប្អូន នៅតែបន្តធ្វើនូវអ្វី ដែលប្អូនគិតថាល្អនៅក្នុងវិស័យតន្រ្តីចម្រៀងខ្មែរ ជូនដល់ប្រជាជាតិដ៏ល្អផូរផង់ ១ នេះបន្តទៀត និងជារៀងរហូត»៕
