បើគិតមកដល់ពេលនេះ រយៈពេលរំលងផុតប្រមាណជា ៤ ថ្ងៃមកហើយ នៃព្រឹត្តិការណ៍ «សាទរកម្ពុជា» ក្នុងរាត្រីឆ្លងឆ្នាំសកល ឆ្នាំ ២០២៤ ឈានចូល ២០២៥ ដោយទទួលបានការសាទរ និង ចូលរួមយ៉ាងច្រើនកុះករពីសំណាក់ភ្ញៀវជាតិ និង អន្តរជាតិ។
ម្យ៉ាងវិញទៀត ក្រឡេកទៅការរៀបចំព្រឹត្តិការណ៍ដ៏ធំអស្ចារ្យនេះ បានរៀបចំកម្មវិធីដ៏សម្បូរបែបជាបន្តបន្ទាប់រួមមាន ពិធីដង្ហែក្បួនថ្មើរជើងសម្រាប់ព្រឹត្តិការណ៍ «សាទរកម្ពុជា» ដែលមានអ្នកចូលរួមប្រមាណ ៣,០០០នាក់ ព្រមកម្មវិធីសប្បាយៗ និង ទស្សនីយភាពសិល្បៈចម្រុះជាច្រើន។ ជាពិសេសនោះ គឺការប្រគំតន្ត្រីមានការចូលរួមពីសំណាក់សិល្បករ សិល្បការិនីល្បីៗជាច្រើនរូបទៀតផង។
ជាក់ស្តែង ការសម្តែងទស្សនីភាពសិល្បៈចម្រុះនោះដែរ ក៏មានការចូលរួមសម្តែងដោយផ្ទាល់នៅលើទឹកដីប្រទេសកម្ពុជាជាលើកដំបូងរបស់ អ្នកអង្គម្ចាស់ នរោត្តម រស្មីខែមុន្នី បុត្រានៃសម្ដេចរាជបុត្រី ព្រះអនុជ នរោត្តម អរុណរស្មី ឯកឧត្ដម កែវ ពុទ្ធរស្មី ផងដែរ។ ក្នុងនោះ ការសម្តែងរបស់អ្នកអង្គម្ចាស់ នរោត្តម រស្មីខែមុន្នី បានឆក់យកបេះដូងអ្នកទស្សនាជាច្រើន។
ដោយឡែក នៅរាត្រីថ្ងៃទី ០៣ ខែមករា ឆ្នាំ ២០២៥ កន្លងទៅនេះ នៅលើផេកហ្វេសប៊ុកផ្លូវការរបស់សម្ដេចរាជបុត្រី ព្រះអនុជ នរោត្តម អរុណរស្មី បានបង្ហោះសារបង្ហាញព្រះហរទ័យក្រោយការសម្តែងរបស់ព្រះរាជបុត្រា ពោលគឺអ្នកអង្គម្ចាស់ នរោត្តម រស្មីខែមុន្នី ដោយទ្រង់មានព្រះបន្ទូលថា៖ «Muni Norodom សូមអរគុណ ដល់សហភាពសហព័ន្ធយុវជនកម្ពុជា ដែលបានផ្តល់កិត្តិយសឱ្យចូលរួមសម្តែងក្នុងព្រឹត្តិការណ៍ «សាទរកម្ពុជា» ពោរពេញទៅដោយអារម្មណ៍រីករាយ ហើយមានប្រជាជនចូលរួមទស្សនាយ៉ាងច្រើនក្រៃលែង ដែលជាព្រឹត្តិការណ៍១ដ៏អស្ចារ្យ»៕
