នៅរសៀលថ្ងៃទី ០៣ ខែវិច្ឆិកា ឆ្នាំ ២០២៥ នេះ ស្នងការដ្ឋាននគរបាលខេត្តតាកែវ បានជូនដំណឹងឱ្យបានដឹងថា បុគ្គលដែលធ្វើមាតិកាបង្ខូចបង្អាប់កេរ្តិ៍ឈ្មោះខេត្តតាកែវ ពេលនេះបានវាស់កម្ពស់បានសម្រេច។
ខាងស្នងការបានឱ្យដឹងថា ក្រោយបុគ្គលអ្នកផលិតមាតិកាឈ្មោះ «បញ្ញា-Panha» បានផលិតវីដេអូបែបកំប្លែង និង ចម្អកទៅដល់អ្នកខេត្តតាកែវ ដោយផលិតវីដេអូ ដើរសួរយុវជនថា «ខេត្តណាសាហាវព្រែផ្សៃជាងគេ» ហើយមានអ្នកឆ្លើយថាខេត្តតាកែវ នៅផ្លូវថ្មើរជើង walk street រាជធានីភ្នំពេញ នាយឧត្តមសេនីយ៍ ស ថេត និង ឯកឧត្តម វ៉ី សំណាង អភិបាលខេត្តតាកែវ បានបញ្ជាឱ្យកម្លាំងនគរបាលខេត្ត ស្រាវជ្រាវកំណត់មុខសញ្ញា ដើម្បីហៅមកធ្វើការសាកសួរ។
ជាក់ស្ដែងនៅវេលាម៉ោង ២១៖៣០ នាទី ថ្ងៃទី ០២ ខែវិច្ឆិកា ឆ្នាំ ២០២៥ កម្លាំងជំនាញនគរបាលខេត្តតាកែវ បានធ្វើការអប់រំឈ្មោះ តែ បញ្ញា ភេទប្រុស អាយុ ២០ ឆ្នាំ ទីលំនៅស្រុកគិរីវង់ ខេត្តតាកែវ ឱ្យសុំទោស និង ធ្វើកិច្ចសន្យាបញ្ឈប់រាល់សកម្មភាពផលិតមាតិកាដែលធ្វើឱ្យប៉ះពាល់កិត្តិយស សេចក្ដីថ្លៃថ្នូររបស់ខេត្តតាកែវតទៅទៀត៕
