នៅថ្ងៃទី ០៧ ខែកក្កដា ឆ្នាំ ២០២៥ វេជ្ជបណ្ឌិត ហ៊ាង រតនា ដែលគេស្គាល់ថាជាប្រធានមន្ទីរសម្រាកព្យាបាលជំងឺ «មេត្តាសំណង់១២» បានបង្ហោះសារ សុំឱ្យបងប្អូនស្ងប់ចិត្តសិន ដែលលោកនឹងបកស្រាយបន្ទាប់ពីគ្រួសារបានធ្វើបុណ្យរួចរាល់ទៅតាមប្រពៃណី ទាក់ទិនទៅនឹងករណីមន្ទីរសម្រាកព្យាបាលជំងឺរបស់លោក បានរងការចោទថាព្យាបាលក្មេងប្រុសអាយុ ៨ ខែ ម្នាក់បណ្ដាលឱ្យស្លាប់ ហើយត្រូវបានក្រុមគ្រួសារកើតទុក្ខមិនសុខចិត្ត ប្ដឹងសមត្ថកិច្ចឱ្យចុះត្រួតពិនិត្យ និង ស្រាវជ្រាវដើម្បីរកយុត្តិធម៌ឱ្យពួកគាត់។
តាមរយៈគណនីរបស់វេជ្ជបណ្ឌិត ហ៊ាង រតនា បានបង្ហោះសារថា ៖ «សារនេះចង់ផ្ញើទៅបងប្អូនអ្នកដែលស្គាល់ខ្ញុំ រាប់អានខ្ញុំ និងជាអ្នកជំងឺរបស់ខ្ញុំ បងប្អូនស្គាល់ខ្ញុំហើយថាខ្ញុំជាមនុស្សបែបណា។ ពេលនេះខ្ញុំចង់ឱ្យ បងប្អូនស្ងប់ចិត្ត និង ចងឱ្យគ្រួសារក្មេងធ្វើបុណ្យតាមប្រពៃណីសិន រឿងរ៉ាវលម្អិតបែបណា នឹងបកស្រាយនៅពេលក្រោយ។ ក្នុងនាមខ្ញុំជាប្រធានគ្លីនិក ខ្ញុំរង់ចាំដោះស្រាយ និង ទទួលខុសត្រូវគ្រប់បែបយ៉ាង បើសិនវាជាការធ្វេសប្រហែសរបស់ក្រុមគ្រូពេទ្យខ្ញុំមែន ក្នុងការបញ្ជូនជំងឺយឺត ឬ កំហុសណាមួយ។ ក្រុមគ្រូពេទ្យយើងខ្ញុំទាំងអស់ពិតជាមិនចង់ឱ្យមានរឿងបែបនេះកើតឡើងនោះទេ ប៉ុន្តែខ្ញុំគិតថាក្នុងអាជីពជាគ្រូពេទ្យពិបាកនឹងជៀសក្នុងការជួបរឿងបែបនេះណាស់។ ក្នុងចិត្តខ្ញុំពេលនេះក៏ឈឺចាប់ និង សោកស្តាយមិនចាញ់ក្រុមគ្រួសារក្មេងដែរ»។
សូមរំឭកផងដែរថា នៅថ្ងៃទី ០៧ ខែកក្កដា ឆ្នាំ ២០២៥ វេលាម៉ោង ៩៖៤០ នាទីព្រឹក មន្ទីរសម្រាកព្យាបាលជំងឺ «មេត្តាសំណង់១២» បានរងការចោទថាព្យាបាលក្មេងប្រុសអាយុ ៨ ខែម្នាក់បណ្ដាលឱ្យស្លាប់ ហើយត្រូវបានក្រុមគ្រួសារកើតទុក្ខមិនសុខចិត្ត ប្ដឹងសមត្ថកិច្ចឱ្យចុះត្រួតពិនិត្យ នៅទីតាំងមន្ទីរពេទ្យដែលស្ថិតនៅផ្ទះលេខ ៦៤L ផ្លូវលេខ ២៦៥ ភូមិទី ១៣ សង្កាត់ទឹកល្អក់ទី ៣ ខណ្ឌទួលគោក រាជធានីភ្នំពេញ។ ក្មេងប្រុសដែលបានបាត់បង់ជីវិតមានឈ្មោះ វង់ ចន្ទ វឌ្ឍនៈវិភូ អាយុ ៨ ខែ បានស្លាប់នៅវេលាម៉ោង ៧៖៥០ នាទីព្រឹក បន្ទាប់ពីបញ្ជូនចេញពីមន្ទីរសម្រាកព្យាបាលជំងឺ «មេត្តាសំណង់១២»៕
