ពិធីមង្គលការរបស់តារាចម្រៀងស្រីរូបស្រស់ រ៉ាប៊ី និង កីឡាករបាល់ទាត់រូបសង្ហា លោក Nick បាន និង កំពុងដំណើរការយ៉ាងរលូននៅថ្ងៃទី ៩ ខែឧសភា ឆ្នាំ ២០២៥ នេះ ដោយកម្មវិធីទាំងមូលបានប្រព្រឹត្តឡើងយ៉ាងអធិកអធមក្រោមវត្តមានចូលរួមពីបណ្ដាសាច់ញាតិទាំងសងខាង ក៏ដូចជាភ្ញៀវកិត្តិយសជាច្រើន។
ក្នុងនោះដែរ អ្វីដែលកាន់តែពិសេស កម្មវិធីតាំងពីចូលរោងកាលពីល្ងាចមិញ រហូតមកដល់ព្រឹកនេះ របស់កូនកំលោះកូនក្រមុំថ្មីថ្មោងមួយគូរនេះ គឺពិតជារៀបចំទៅតាមបែបបទប្រពៃណីខ្មែរយ៉ាងខ្ជាប់ខ្ជួន។ ម្យ៉ាងវិញទៀតនោះ ក្រឡេកទៅមើលសម្លៀកបំពាក់វិញ គឺសមសួន ដោយកូនក្រមុំមានរូបសម្រស់ស្រស់ផូរផង់សមជានារីខ្មែរក្នុងសម្លៀកបំពាក់ប្រពៃណី ចំណែកកូនកំលោះក៏ស្រស់សង្ហា រូបរាងខ្ពស់ស្រឡះ ទឹកមុខញញឹមពោរពេញដោយសុភមង្គល។
ដោយឡែក ទន្ទឹមនឹងការអបអរនោះ ក្នុងពិធីកាត់សក់បង្កក់សិរីរបស់ រ៉ាប៊ី និង លោក Nick Taylor ដែលមាន នាយក្រួច និង ស្រីអ៊ីត ជាអ្នកភ្លេងការកាត់សក់នោះ បានធ្វើឱ្យគ្រួសារ មេបាទាំងសងខាង និង ភ្ញៀងកិត្តិយសចូលរួមអស់សំណើចមិនតិច ខណៈ នាយក្រួច បានជជីកសួរលេងពាក់ព័ន្ធរឿងផ្សំដំណេក។
ក្នុងនោះ នាយក្រួច សួរដល់ៗ កូនកំលោះក៏ឆ្លើយចំៗ ទាំងនិយាយខ្មែរមិនសូវច្បាស់ និង មានការបោះបារ៉ូលពីកូនក្រមុំផងនោះ Nick Taylor បានឆ្លើយថា៖ «រៀបការហើយ តមផ្សំដំណេក ព្រោះស្អែកប្រកួតបាល់ទាត់» ធ្វើឱ្យអ្នកនៅក្នុងរោងការនាំគ្នាសើចពេញរោង៕
សូមចុចទីនេះ ដើម្បីទស្សនាវីដេអូ ៖
