ថ្មីៗនេះ លើបណ្ដាញសង្គមមហាជនអ្នកគាំទ្ររបស់តារាចម្រៀងស្រី ទេព បូព្រឹក្ស កំពុងផ្ទុះចាប់អារម្មណ៍ចែករំលែក និង បង្ហាញក្ដីរំភើបអបអរខ្លាំង ក្រោយពីទទួលដំណឹងថាអ្នកនាងនឹងតំណាងជាសិល្បករកម្ពុជាចូលរួមក្នុងកម្មវិធីដ៏ធំ 2025 ROUND Festival នៅឯប្រទេសម៉ាឡេស៊ី។
តាមរយៈការបង្ហោះលើហ្វេសប៊ុករបស់អ្នកនាង ទេព បូព្រឹក្ស បានឱ្យដឹងដែរថា អ្នកនាងនឹងត្រៀមនាំយកការសម្ដែងទស្សនីយភាពសិល្បៈខ្មែរច្រើនទម្រង់បែបសហសម័យមាន ល្ខោនខោល, របាំមណីមេខលា និង អប្សរា ក្នុងបទចម្រៀង «ទេវរាជ» ជាលើកដំបូងលើឆាកអន្តរជាតិនេះ។
ក្នុងនោះ អ្នកនាង ទេព បូព្រឹក្ស បានរៀបរាប់ថា ៖ «2025 ROUND Festival in Malaysia នាងខ្ញុំ ទេព បូព្រឹក្ស នឹងនាំយកការសម្តែងបែបសហសម័យរួមមាន ល្ខោនខោល, របាំមណីមេខលា និង អប្សរា ជាលើកទីមួយនៃសិល្បៈខ្មែរដែលនឹងរួមបញ្ចូលគ្នានៅលើឆាកអន្តរជាតិក្រោមទស្សនីយភាពបទ «ទេវរាជ» អ្វីដែលនាងខ្ញុំធ្លាប់ស្រមៃថានឹងដឹកដៃវប្បធម៌ទៅកាន់ឆាកអន្តរជាតិ ពេលនេះសម្រេចចេញជាផ្កាហើយ។ BRING OUR KHMER TO THE TOP»។
ព្រឹត្តិការណ៍ ROUND Festival 2025 ត្រូវបានគេដឹងថាជាកម្មវិធីមហោស្រពតន្រ្តីអាស៊ាន-កូរ៉េ «Asian Korea Music Festival» ដែលរៀបចំឡើងជារៀងរាល់ឆ្នាំនៅលើទឹកដីប្រទេសកូរ៉េ តែសម្រាប់ឆ្នាំ ២០២៥ នេះ ROUND Festival នឹងប្រព្រឹត្តឡើងនៅឯប្រទេសម៉ាឡេស៊ី មានការចូលរួមពីកំពូលតារាចម្រៀងល្បីៗនៅបណ្ដាប្រទេសអាស៊ាន និង ប្រទេសកូរ៉េខាងត្បូង៕
សូមចុចទីនេះដើម្បីទស្សនាវីដេអូ៖
