កាលពីថ្ងៃទី ១៩ ខែវិច្ឆិកា ឆ្នាំ ២០២៥ កន្លងទៅនេះ អ្នកលេងបណ្តាញសង្គមហ្វេសប៊ុក ជាពិសេស សិល្បករ សិល្បការិនីជាច្រើន បានបង្ហាញក្តីរន្ធត់ចិត្តបន្ទាប់ពីទទួលបានដំណឹងមរណភាពរបស់លោក អ៊ុន សិទ្ធា ដែលជាតារាបង្ហាញម៉ូដ ពិធីករ និង តារាសម្តែងដ៏មានប្រជាប្រិយភាពមួយរូប។
ដំណឹងខាងលើនេះ បានធ្វើឱ្យមហាជន និង មិត្តទាំងក្នុង ក្រៅសិល្បៈជាច្រើន បានបង្ហាញក្តីរន្ធត់ និង ទទួលយកមិនទាន់បាន ខណៈលោក អ៊ុន សិទ្ធា ចាកចេញភ្លាមៗពេក ដោយមិនដែលបង្ហើបដំណឹងពីសុខភាពរបស់ខ្លួនជាសាធារណៈម្តងណាឡើយ។ លើសពីនោះ អ្វីដែលកាន់តែសោកស្តាយខ្លាំងនោះ គឺលោក អ៊ុន សិទ្ធា ត្រូវបានគេលើកឡើងថា លោក គឺជាធនធានដ៏ល្អម្នាក់ និង ជាមនុស្សមានទឹកចិត្តកាលលោកនៅមានជីវិតទៀតផង។
យ៉ាងណាមិញ ក្រឡេកទៅមើល លោក សឿន វីតា ដែលត្រូវបានដឹងថា ជាមិត្តស្និទ្ធស្នាលរបស់លោក អ៊ុន សិទ្ធា បានបង្ហាញអារម្មណ៍ឈឺចាប់យ៉ាងខ្លាំងនៃការបាត់បង់មិត្តសម្លាញ់ ជាពិសេសនោះ គឺជាបុគ្គល ដែលតែងតែជួយលោក ពេលលោកលំបាកកន្លងមក។ ក្នុងនោះ ដើម្បីជាការតបស្នងគុណដ៏ធំធេងរបស់លោក អ៊ុន សិទ្ធា ដែលបានជួយលោកគ្រប់ពេល នៅពេលលោកមានបញ្ហានោះ លោក សឿន វីតា បានកោរសក់ ដើម្បីបួសមុខភ្លើងជូនមិត្តសម្លាញ់ចុងក្រោយផងដែរ។
លោក សឿន វីតា បានរៀបរាប់ថា៖ «គ្នាកោរសក់បួសមុខភ្លើងសងគុណសម្លាញ់ហើយ គ្នាមិនបានកុហកសម្លាញ់ទេ! សូមសម្លាញ់ស្ងប់ចិត្តណា សម្លាញ់ ជាបេះដូងរបស់គ្នា។ គ្នារឹងមាំណាស់ តែសម្លាញ់ទៅមិនប្រាប់គ្នាចឹង គ្នាមិនអាចរឹងមាំបានទេ»៕
សូមចុចទីនេះ ដើម្បីទស្សនាវីដេអូ៖
