មហាជននិយមតាមដានព័ត៌មានសិល្បៈ ច្បាស់ជាបានជ្រាបមកហើយពីស្ថានភាពជំងឺរបស់តារាកំប្លែង នាយ តាក់ស៊ី គឺគ្រូពេទ្យឱ្យជម្រើសចុងក្រោយ ២ គឺត្រូវលាងឈាម ៣ ដងក្នុងមួយអាទិត្យ និង មួយទៀតត្រូវវះកាត់ប្ដូរក្រលៀន។
ក្នុងនោះ ស្ថានភាពជំងឺរបស់ នាយ តាក់ស៊ី នាពេលនេះ គឺមានជំងឺទឹកនោមផ្អែម បណ្តាលឱ្យខូចក្រលៀន និង មានទឹកដក់ក្នុងសួត ដោយកំពុងសម្រាកព្យាបាលនៅមន្ទីរពេទ្យកេតុមាលា ដោយត្រូវការថវិកាច្រើនក្នុងការព្យាបាលទៀតផង។
ក្រោយពីទទួលបានដំណឹងខាងលើនេះ មហាជន និង មិត្តក្នុងក្រៅសិល្បៈជាច្រើនបានសួរសុខទុក្ខ និង ជួយជាថវិកាជាបន្តបន្ទាប់ ដើម្បីជួយដល់ការព្យាបាលរបស់ នាយ តាក់ស៊ី ផងដែរ។ ម្យ៉ាងវិញទៀត សមាគមនសិល្បករខ្មែរ ក៏បាអំពាវនាវដល់មហាជន ក្នុងការចូលរួមបរិច្ចាគថវិកា ដើម្បីរំលែកការលំបាកតារាកំប្លែង តាក់ស៊ី ដូចគ្នាដែរ។
ងាកទៅកាន់អតីតភរិយា នាយ តាក់ស៊ី គឺអតីតតារាកំប្លែង ស្រីភីម វិញ ក៏កំពុងត្រូវបានមហាជនចាប់ក្រសែភ្នែកទៅកាន់អ្នកនាង និង លើកជាសំណួរជាច្រើនថា «អ្នកនាងបានទៅសួរសុខទុក្ខអតីតស្វាមីឬអត់?» ហើយក៏មានមហាជនខ្លះវាយប្រហារដល់អ្នកនាង «ថាមិនអើពើនឹងអតីតស្វាមី» ជាដើម។
យ៉ាងណាមិញ ក្រោយរងការសាកសួរជាច្រើនដូចៗគ្នានោះ ស្រីភីម ក៏មិននៅស្ងៀមនោះឡើយ អ្នកនាងក៏បានបង្ហោះវីដេអូឆ្លើយតបវិញថា អ្នកនាង បានទៅសួរសុខទុក្ខអតីតស្វាមីដល់មន្ទីរពេទ្យរួចរាល់ហើយ។ លើសពីនោះ អ្នកនាងក៏បានជូនថវិកា និង បាននាំកូនស្រី ដែលជាឈាមជ័ររបស់ នាយ តាក់ស៊ី ទៅលើកទៅចិត្តឪពុកដល់មន្ទីរពេទ្យទៀតផង។ សូមទស្សនាវីដេអូខាងក្រោម៖
