និយាយពីតារាចម្រៀងស្រីល្បីឈ្មោះអ្នកនាង សុគន្ធ និសា ស្របពេលមហាជនចាប់អារម្មណ៍ដឹងថាអ្នកនាងបានក្លាយជាតារាចម្រៀងឯករាជ្យមួយរូប ឃើញថាមួយរយៈចុងក្រោយនេះ អ្នកនាងហាក់អាកខានមិនសូវឃើញបង្ហាញស្នាដៃចម្រៀងថ្មីៗដូចពីមុន។
យ៉ាងណាមិញ ដ្បិតតែមិនឃើញចេញស្នាដៃចម្រៀងថ្មីៗ ប៉ុន្តែតារាចម្រៀងស្រីរូបនេះ ក៏កំពុងក្ដោបបានទីផ្សារខ្លាំងតាមរយៈការអញ្ជើញចូលរួមច្រៀងក្នុងកម្មវិធីតន្រ្តីតូចធំ កម្មវិធីមង្គល និង តាមបណ្ដា Club ឬ Pub ផ្សេងៗ។
ដោយឡែក ថ្មីៗនេះ អ្នកនាង សុគន្ធ និសា បានធ្វើឱ្យមហាជនអ្នកគាំទ្រចាប់អារម្មណ៍ជាថ្មីលើស្នាដៃចម្រៀងរបស់អ្នកនាង ខណៈបានឃើញតារាស្រីរូបនេះ បញ្ចេញ MV បទចម្រៀងថ្មីមួយបទលើហ្វេសប៊ុក ដែលជាស្នាដៃរួមគ្នាជាមួយនឹងតារាពហុជំនាញ រ៉ូលីន កំពុងផ្ទុះការគាំទ្រពេញចិត្ត និង ចែករំលែកខ្លាំងពីមហាជនលើបណ្ដាញសង្គម។
ស្នាដៃ MV បទចម្រៀងថ្មីរបស់អ្នកនាង សុគន្ធ និសា និង រ៉ូលីន នេះដែរ ជាចម្រៀងត្រៀមសម្រាប់ចូលឆ្នាំខ្មែរ មានចំណងជើងថា «ចាក់ក្រឡេកទយ» ដែលជាចង្វាក់ប្រពៃណីបែបសប្បាយៗ ទាំងបទភ្លេង ទាំងប្លង់ថត និង ការតុបតែងខ្លួនស្ទីលប្លែកស័ក្តិសមខ្លាំងក្នុងឱកាសបុណ្យចូលឆ្នាំប្រពៃណីខ្មែរខាងមុខ៕
