ថ្មីៗនេះ បវរកញ្ញាវ័យក្មេង ជូរី ល្អហួស បានធ្វើឱ្យមហាជនអ្នកគាំទ្រកាន់តែចាប់អារម្មណ៍ស្ងប់ស្ងែងខ្លាំង ក្រោយពីបង្ហាញសកម្មភាពគួរឱ្យសរសើរលើទឹកដីប្រទេសចិន ដែលនាងបានតុបតែងខ្លួនគ្រងឈុតអប្សរារាំរបាំនៅមុខផ្ទាំងប្រាសាទទឹកកកនៅឯទីក្រុង Harbin ក្រោមអាកាសធាតុកំពុងចុះត្រជាក់ខ្លាំងស្ថិតនៅសីតុណ្ហភាព – ១៦ អង្សារ។
សកម្មភាពរបស់ ជូរី ល្អហួស នេះដែរ កំពុងត្រូវបានមហាជនអ្នកលេងបណ្ដាញសង្គមផ្ទុះការចែករំលែកភ្ជាប់ជាមួយក្ដីរំភើបចិត្ត និង មោទកភាពខ្លាំងចំពោះបវរកញ្ញាវ័យក្មេងរូបនេះ ដែលតែងជួយលើកស្ទួយផ្សព្វផ្សាយវប្បធម៌ខ្មែរទៅកាន់ពិភពលោក។
លើសពីនេះ តាមរយៈការបង្ហោះរបស់អ្នកគ្រប់គ្រងស្ថាប័នបវរកញ្ញាវ័យក្មេងលោក អ៊ិន វិចិត្រ បានឱ្យដឹងថា សកម្មភាពរបស់ ជូរី ល្អហួស ធ្វើដំណើរទៅប្រទេសចិន និង បានរាំរវបាំអប្សរាមុខផ្ទាំងទឹកកកនោះ គឺជាការអញ្ជេញពីរដ្ឋបាលខេត្ត Harbin ប្រទេសចិន ដើម្បីចូលរួមបង្ហាញវប្បធម៌កម្ពុជា និង កម្មវិធីប្រគុំតន្រ្តីក្នុងកម្មវិធី «ផ្សព្វផ្សាយវប្បធម៍ និង ទេសចរណ៍ក្នុងតំបន់អាស៊ាន» លើទឹកដីប្រទេសចិននេះផងដែរ។
ជាមួយគ្នានោះ មិនត្រឹមតែទទួលបានការអញ្ជើញចូលរួមកម្មវិធីនេះទេ ល្អហួស ថែមទាំងមានកិត្តិយសបានឡើងបកស្រាយចម្រៀងផ្ទាល់ជាភាសាចិន និង ខ្មែរ ជាមួយតារាល្បីប្រចាំប្រទេសចិនយ៉ាងរំភើបទៀតផង។ ក្នុងនោះ ល្អហួស ក៏បានរៀបរាប់ភ្ជាប់ជាមួយវីដេអូចម្រៀងថា ៖ «នាងខ្ញុំសូមអរគុណដល់រដ្ឋាបាលទីក្រុងហាពីង (Harbin) នៃប្រទេសចិន ដែលបានអញ្ជើញរូបនាងខ្ញុំចូលរួម កម្មវិធី «ផ្សព្វផ្សាយវប្បធម៌ និង ទេសចរណ៍ក្នុងតំបន់អាស៊ាន» ប្រទេសចិន និង កម្ពុជាជាមិត្តសម្លាញ់រហូតទៅ»៕
សូមទស្សនាវីដេអូខាងក្រោម៖
