ពីមុនត្រឹមតែធ្វើវីដេអូបង្ហោះនៅលើ TikTok ឥលូវនេះ នាង Alex Consani បានក្លាយជាតារាម៉ូឌែលប្តូរភេទទៅជាស្រីដំបូងគេ ដែលឈ្នះពានរង្វាន់ម៉ូឌែលប្រចាំឆ្នាំ ឬ Model of the Year ខណៈដែលប្រវត្តិការងាររបស់នាងសុទ្ធតែលំដាប់ខ្ពស់ នាងធ្លាប់ដើរបង្ហាញម៉ូដឱ្យម៉ាកអន្តរជាតិល្បីៗដូចជា Chanel, Stella McCartney និង Victoria’s Secret…ជាដើម។
ម៉ូឌែលប្តូរភេទវ័យ ២១ ឆ្នាំ សញ្ជាតិអាមេរិករូបនេះ គេតែងសម្គាល់នាងតាមរយៈសក់ និង ចិញ្ចើមពណ៌លឿងស។ នាងត្រូវបានប្រកាសតំណែងឈ្នះពានរង្វាន់នៅក្នុងកម្មវិធី 2024 Fashion Awards នៅទីក្រុងឡុងដ៍ ចក្រភពអង់គ្លេស កាលពីល្ងាចថ្ងៃចន្ទ ទី ០២ ខែធ្នូនេះ។
នៅថ្ងៃទទួលពានរង្វាន់ដែលធ្វើឡើងនៅក្នុងសាល the Royal Albert Hall នាង Alex Consani បាននិយាយប្រាប់សារព័ត៌មានអន្តរជាតិថា៖ «ការបោះជំហានធំនៅក្នុងគោលដៅដ៏ត្រឹមត្រូវ។ ឥលូវនេះ ធំធេងជាពេលណាៗទាំងអស់ វាជាការសន្ទនាដ៏សំខាន់ដែលគួរតែលើកឡើងអំពីរបៀបដើម្បីគាំទ្រ និង លើកស្ទួយគ្នាទៅវិញទៅមកយ៉ាងពិតប្រាកដ នៅក្នុងឧស្សាហកម្មនេះ ជាពិសេសសម្រាប់អ្នកដែលគិតថាវាមិនសំខាន់»។
ពិតមែនទៅ នាង Alex Consani បានចុះកុងត្រាជាមួយភ្នាក់ងារម៉ូឌែល IMG Models កាលពីឆ្នាំ ២០១៩ ដែលជាភ្នាក់ងារប្រជុំទៅដោយម៉ូដែលល្បីៗលំដាប់កំពូលរួមមាន នាងClaudia Schiffer, នាង Hailey Bieber និង បងប្អូនស្រីត្រកូល Hadid…ជាដើម។ នាងបានចាប់ផ្តើមល្បីមានគេស្គាល់ដំបូងតាមរយៈបណ្តាញសង្គម TikTok ដែលពេលនេះនាងមានអ្នកតាមដានឬ Follower រហូតដល់ ៤ លាននាក់។ នាងបានចាប់ផ្តើមដើរម៉ូដដំបូងនៅឆ្នាំ ២០២១ ឱ្យម៉ាក Tom Ford និង បន្ទាប់មកដើរឱ្យម៉ាកប្រណីតលំដាប់ខ្ពស់ផ្សេងទៀតដូចជា Alexander McQueen និង Versace។ ចុងក្រោយនេះ កាលពីខែតុលា ឆ្នាំ ២០២៤ នាង Consani និង Valentina Sampaio ដែលជាម៉ូឌែលប្តូរភេទដូចគ្នា បានបង្កើតប្រវត្តិសាស្ត្រ ដោយក្លាយជាម៉ូឌែលប្រុសប្តូរភេទទៅជាស្រីដំបូង ដែលលេចមុខបង្ហាញម៉ូដនៅក្នុងកម្មវិធី Victoria’s Secret Fashion Show៕
ប្រភព៖ CNN
