ថ្មីៗនេះ សារព័ត៌មាន World of Buzz បានទម្លាយករណីដ៏គួរឱ្យហួសចិត្តមួយនៅប្រទេសចិន ដែលមានបុរសជា HR ម្នាក់បោកលុយក្រុមហ៊ុនបានរាប់លានដុល្លារ ដោយការបន្លំដាក់ឈ្មោះបុគ្គលិកខ្យល់ឱ្យចូលធ្វើការ ហើយយកលុយប្រាក់ខែចូលហោប៉ៅខ្លួនឯង។
តាមព័ត៌មានបានឱ្យដឹងថា បុរសរូបនេះមានឈ្មោះថា Yang គេបានចាប់ផ្តើមការងារ ដែលមានតួនាទីជា HR Manager នៅក្រុមហ៊ុនតិចណូឡូជីមួយកន្លែង នាទីក្រុងសៀងហៃ តាំងពីឆ្នាំ ២០១៤។ ដោយឃើញថាក្រុមហ៊ុននៅមិនទាន់មានអ្នកគ្រប់គ្រងទៅលើប្រាក់ខែ Yang ក៏កើតគំនិតមានល្បិចកេងប្រវ័ញ្ចលុយរបស់ក្រុមហ៊ុន ដោយការធ្វើជាជ្រើសរើសបុគ្គលិកក្លែងក្លាយមកចូលធ្វើការ ពោលគឺបន្លំតែឈ្មោះបុគ្គលិកឡើងមកចំនួន ២២ នាក់ ដោយមិនមានអ្នកមកធ្វើការពិតប្រាកដឡើយ រីឯប្រាក់ខែដែលមានឈ្មោះរបស់បុគ្គលិកទាំងនោះ ក៏បានយកមកដាក់ហោប៉ៅខ្លួនឯង។
Yang បានធ្វើបែបនេះមកជាង ៨ ឆ្នាំ ដោយគ្មានការចាប់អារម្មណ៍ពីក្រុមហ៊ុនឡើយ ហើយក៏លួចកិបប្រាក់បានរហូតដល់ទៅ ១៦ លានយ័ន ឬជាង ២ លានដុល្លារឯណោះ។ លុះមកដល់ឆ្នាំ ២០២២ មានបុគ្គលិកមួយរូបនៅផ្នែកហិរញ្ញវត្ថុបានសង្កេតឃើញថាមានបុគ្គលិកមួយរូបមានឈ្មោះនៅក្នុងបញ្ជី ប៉ុន្តែអ្នកនៅក្រុមហ៊ុនមិនដែលឃើញគេសោះ ទើបរឿងនេះឈានដល់ការត្រួតពិនិត្យ ហើយក៏ធ្លាយការពិត ដែលចុងក្រោយ Yang ក៏បានសារភាព។
យ៉ាងណាមិញ Yang បានព្យាយាមសងលុយទៅកាន់ក្រុមហ៊ុនវិញ ប៉ុន្តែក្នុងចំនួនតិចតួច ដែលក្រុមហ៊ុនក៏បានសម្រេចដំណើរការក្តីទៅតាមផ្លូវច្បាប់ ហើយចុងក្រោយ Yang ក៏ត្រូវតុលាការកាត់ទោសឱ្យជាប់ពន្ធធនាគារហូតដល់ ១០ ឆ្នាំ និង ពិន័យជាប្រាក់ផ្សេងទៀត៕
ប្រភព៖ Sanook
