ក្រោយកម្មវិធីប្រកួតបវរកញ្ញា Miss Universe 2025 រកឃើញម្ចាស់មកុដ ដែលបានទៅលើបវរកញ្ញាមកពីប្រទេសម៉ិកស៊ិករួចមក ស្រាប់តែមានរឿងរ៉ាវផ្ទុះឡើងជាថ្មីម្ដងទៀត ដោយលោក Omar Harfouch ដែលជាគណៈកម្មការដើរចេញពីកម្មវិធីកណ្ដាលទី បានចេញមកបង្ហោះបកអាក្រាតកម្មវិធី Miss Universe និង ហៅម្ចាស់មកុដ Miss Universe ថ្មីថាជា «Fake Winner»។
តាមរយៈការបង្ហោះលើបណ្ដាញសង្គម Instagram របស់លោក Omar Harfouch បានអះអាងថា បវរកញ្ញាម៉ិកស៊ិកគឺជាអ្នកឈ្នះក្លែងក្លាយ។ លោករៀបរាប់ថា នៅ ២៤ ម៉ោងមុនការប្រកួតផ្ដាច់ព្រ័ត្រ លោកបានធ្វើបទសម្ភាសជាមួយខាង HBO ដោយទម្លាយថា បវរកញ្ញាម៉ិកស៊ិកនឹងឈ្នះមកុដនេះ ព្រោះតែរឿងជំនួញរកស៊ីជាមួយគ្នា។
លោកបាននិយាយថា ម្ចាស់ Miss Universe លោក Raul Rocha គឺជាដៃគូជំនួញជាមួយឪពុករបស់ Fatima Bosch (Miss Universe ម៉ិកស៊ិក)។ លោក Omar បន្ថែមទៀតថា លោក Raul Rocha ក៏បានជំរុញឱ្យលោកជាគណៈកម្មការនេះ បោះឆ្នោតឱ្យបវរកញ្ញាម៉ិកស៊ិកផងដែរ។
លោក Omar ថា៖ «Raul Rocha និង កូនប្រុសរបស់គាត់បានជំរុញខ្ញុំឱ្យបោះឆ្នោតឱ្យ Fatima Bosch ព្រោះពួកគេត្រូវការឱ្យនាងឈ្នះ ព្រោះវានឹងជារឿងល្អដល់មុខជំនួញពួកគេ។ ពួកគេនិយាយបែបនេះមកខ្ញុំ»។
ចុងក្រោយ លោក Omar Harfouch បានបញ្ជាក់ទៀតថា ការពិតគ្រប់យ៉ាងពីក្រោយបវរកញ្ញាឈ្នះមកុដក្លែងក្លាយនឹងត្រូវលាតត្រដាងលើ HBO ក្នុងខែឧសភា ឆ្នាំ ២០២៦ ខាងមុខ៕
