លេចធ្លោដល់អន្តរជាតិ! ដាដាវ ស្ត្រីខ្លាំងទាំងសិល្បៈ និង អាជីវកម្មផលិតផលសម្រស់ មានយុទ្ធសាស្ត្រទីផ្សារមិនធម្មតា

មួយរយៈក្រោយនេះ កូនខ្មែរវ័យក្មេងជាច្រើនបានងាកមកបង្កើតប្រ៊េនក្នុងស្រុក ជាពិសេស ទៅលើផលិតផលសម្រស់។​ មួយក្នុងចំណោមនោះ ដាដាវ (Daa Dao) ដែលមហាជនស្គាល់ថា ជា Influencer ​និង ជាតារាសម្តែងដ៏មានប្រជាប្រិយភាព នាងក៏បានបង្កើតម៉ាកផលិតផលក្នុងស្រុក កំពុងទទួលបានការគាំទ្រខ្លាំងផងដែរ។

ជាក់ស្តែង ទន្ទឹមនឹងអាជីពសិល្បៈ នាងជាស្ត្រីជំនួញដ៏មានឥទ្ធិពល ជាស្ថាបនិកនៃក្រុមហ៊ុន ផលិតផលសម្រស់ B.A.R.E Trading Co., Ltd., ដែលមានផលិតផលឡេការពារកម្តៅថ្ងៃម៉ាក BARE​ និង ផលិតផលតុបតែងមុខម៉ាក AMORE ដែលមានដូចជា ពណ៌ផាត់ថ្ពាល់, ក្រែមលាបបបូរមាត់, Shimmer Oil និង Lip Balm ជាដើម។

មានវ័យ ២៨ ឆ្នាំ ក្នុងនាមជាស្ថាបនិក និង ជានាយកប្រតិបត្តិនៃក្រុមហ៊ុន ដាដាវ នាងដឹកនាំជំរុញទិសដៅយុទ្ធសាស្ត្រ ការអភិវឌ្ឍន៍ម៉ាកយីហោ និង ពង្រីកទីផ្សារ ដោយប្រាកដជាមួយគុណភាពខ្ពស់ និង និរន្តរភាពជាស្នូលនៃអាជីវកម្មរបស់នាង។ តាមរយៈការបង្កើតម៉ាកផលិតផលក្នុងស្រុក នាងប្តេជ្ញាពង្រឹងការងារក្នុងស្រុក លើកកម្ពស់ស្ត្រីក្នុងភាពជាសហគ្រិន និង ការតស៊ូមតិសម្រាប់ការផ្គត់ផ្គង់ប្រកបដោយក្រមសីលធម៌។

ដោយសារភាពលេចធ្លោទាំងអាជីពសិល្បៈ និង ជំនួញ កន្លងទៅថ្មីៗនេះ ដាដាវ ត្រូវបានទស្សនាវដ្តីអន្តរជាតិដ៏ល្បី Prestige ជ្រើសរើសជាបុគ្គលមួយរូប ក្នុងចំណោមបុគ្គល ៤០ នាក់ អាយុក្រោម ៤០ ឆ្នាំ នៅក្នុងកម្មវិធី Prestige 40 under 40 2025 ដែលបង្ហាញពីបុគ្គលមានសមត្ថភាពខ្ពស់ ស្នាដៃល្អនៅក្នុងអាជីព និង មានឥទ្ធិពលទាំងក្នុងប្រទេស និង បណ្តាប្រទេសមួយចំនួននៅក្នុងតំបន់អាស៊ី៕