ថ្មីៗនេះ Gun Jompalang ជា Influencer ល្បីរបស់ថៃ ដែលតែងរកវិធីថ្មីៗមករុកកួនប្រជាជនកម្ពុជានៅភូមិព្រៃចាន់ ពេលនេះហាក់ដូចជាបានលេចកន្ទុយកញ្ជ្រោងមកបណ្ដើរៗហើយ ព្រោះត្រូវគេសង្ស័យរឿងកិបកេងលុយមូលនិធិ ប្រជាជនថៃនាំគ្នាប្រទេចផ្តាសា ដល់ថ្នាក់លែងហ៊ានមកជាយដែនទៀតហើយ។
តាមព័ត៌មានបានឱ្យដឹងថា Gun Jompalang បានបង្កើតមូលនិធិមួយឈ្មោះ Gun Jompalang Chhauy Su ដែលទុកសម្រាប់ទទួលការបរិច្ចាគលុយពីមហាជន ដើម្បីជួយទៅដល់គ្រាគ្រោះអាសន្នណាមួយនៅក្នុងប្រទេស ដែលម្តងៗទទួលបានរាប់សិបលានបាតឯណោះ ហើយជាក់ស្តែង គឺ Gun Jompalang បានយកលុយទាំងនោះមកប្រើក្នុងវិធីធ្វើបាបរុកកួនប្រជាជនខ្មែរកាលពីពេលកន្លងទៅនេះឯង ប៉ុន្តែថ្មីៗនេះ មានការគាស់កកាយមកថា Gun Jompalang មិនមានឈ្មោះជាប្រធានមូលនិធិនេះទេ ហើយនៅក្នុងឯកសារច្បាប់របស់មូលនិធិបានបញ្ជាក់ថា បើសិនជាមូលនិធិនេះត្រូវបានបិទ នោះលុយទាំងអស់នឹងត្រូវផ្ទេរទៅមូលនិធិរបស់បុគ្គលផ្សេងទៅវិញ។
លើសពីនេះទៅទៀត ចំនួនទឹកប្រាក់ដែលទទួលបាន Gun Jompalang ក៏មិនដែលបង្ហាញឱ្យមហាជនដឹង ហើយពេលយកទៅប្រើប្រាស់អ្វីខ្លះក៏មិនដែលទម្លាយឱ្យបានច្បាស់លាស់នោះដែរ ខណៈគេសង្កេតឃើញថា Gun Jompalang មានឡានទំនើបៗច្រើនគ្រឿងចតនៅក្នុងផ្ទះ ទាំងដែលមិនឃើញរកស៊ីអ្វីធំដុំសោះ។ ទង្វើទាំងអស់នេះ បានធ្វើឱ្យប្រជាជនថៃបាននាំគ្នាសង្ស័យ និងចាប់ផ្តើមអស់ទំនុកចិត្តទៅលើ Gun Jompalang ដោយមានអ្នកខ្លះទៀត ថែមទាំងបាននាំគ្នាជេរផ្តាសា និងទាមទារឱ្យផ្នែកច្បាប់ចូលមកត្រួតពិនិត្យទៀតផង៕
ប្រភព៖ Khaosod
