ទីបំផុត ជនសង្ស័យ ២ នាក់ ពាក់ព័ន្ធករណីលួចគ្រឿងអលង្ការបុរាណមានតម្លៃពីសារមន្ទីរ Louvre នាកណ្ដាលទីក្រុងប៉ារីស ប្រទេសបារាំង ត្រូវប៉ូលិសចាប់ខ្លួនបានហើយ។
តាមទីភ្នាក់ងារសារព័ត៌មាន AFP បានបញ្ជាក់ថា ជនសង្ស័យម្នាក់ចាប់ខ្លួនបាននៅម៉ោងប្រមាណ ១០ យប់ ថ្ងៃទី ២៥ ខែតុលា ឆ្នាំ ២០២៥ (ពេលវេលាក្នុងតំបន់) នាព្រលានយន្តហោះ Paris-Charles de Gaulle ខណៈរូបគេត្រៀមខ្លួនឡើងយន្តហោះទៅប្រទេសអាល់ហ្សេរី។ ចំណែក ជនសង្ស័យទី ២ ក៏ត្រូវបានចាប់ខ្លួនបន្ទាប់គ្នានោះដែរនៅប៉ារីស។ ជនសង្ស័យទាំង ២ ស្ថិតក្នុងវ័យខ្ទង់ ៣០ ឆ្នាំដូចគ្នា និង មកពីតំបន់ Seine St-Denis។
គួររំឭកថា កាលពីព្រឹកថ្ងៃទី ១៩ ខែតុលា ឆ្នាំ ២០២៥ (ពេលវេលាក្នុងតំបន់) មានជនសង្ស័យចំនួន ៤ នាក់ បានចតឡានរបស់ពួកគេនៅខាងក្រៅសារមន្ទីរ Louvre និង បានប្រើប្រាស់ជណ្ដើរឡើងទៅជាន់ទី ២ នៃសារមន្ទីរ ចូលទៅខាងក្នុងបំបែកកញ្ចក់ការពារនៃទូតាំង រួចលួចយកគ្រឿងអលង្ការបុរាណមានតម្លៃអស់ជាច្រើនគ្រឿង។ តាមឱ្យដឹង ដំណើរការលួចនោះចាយពេលត្រឹមតែ ៧ នាទីប៉ុណ្ណោះ ហើយគ្រឿងអលង្ការដែលក្រុមចោរលួចយកទៅបាននោះគិតសរុបជាតម្លៃប្រមាណ ១០២ លានដុល្លារ៕
