បេសកកម្មរបស់ ចុងភៅណាក់ អភិរក្ស អភិវឌ្ឍន៍ និង ផ្សព្វផ្សាយម្ហូបខ្មែរទៅកាន់ឆាកសកល ពិតជាបានកើតឡើងបន្តបន្ទាប់ប្រាកដមែន។ ដូចឃើញជាក់ស្តែង ជារឿយៗ ចុងភៅណាក់តែងលេចមុខជាមួយម្ហូបខ្មែរនៅលើសារព័ត៌មាន ក៏ដូចជាទស្សនាវដ្តីអន្តរជាតិល្បីៗ ដែលធ្វើឱ្យកេរ្តិ៍ឈ្មោះម្ហូបខ្មែរ និង ចុងភៅខ្មែរ មានភាពល្បីល្បាញជាសកល។
កាន់តែមោទកភាពទៀតនោះ ថ្មីៗនេះ ចុងភៅណាក់ ត្រូវបានទស្សនាវដ្តីដ៏ល្បី និង មានឥទ្ធិពលបំផុតនៅប្រទេសអាល្លឺម៉ង ចុះផ្សាយអំពីអាជីពរួមជាមួយម្ហូបខ្មែរ។ ទស្សនាវដ្តីនេះមានឈ្មោះថា Der Spiegel ដែលផ្តោតលើការចេញព័ត៌មានសំខាន់ៗប្រចាំសប្តាហ៍។
បង្ហាញពីអារម្មណ៍រំភើប និង មោទកភាព ចុងភៅណាក់ បានបង្ហោះសារយ៉ាងខ្លីនៅលើបណ្តាញសង្គមហ្វេសប៊ុក ជូនប្រជាជនកម្ពុជាផងដែរ។ ចុងភៅណាក់ បានសរសេរយ៉ាងដូច្នេះថា៖ យើងខ្ញុំពិតជាមានក្តីរំភើប និង មោទកភាពខ្លាំងណាស់ ដែលម្ហូបអាហារខ្មែរយើងត្រូវបានបង្ហាញក្នុងទស្សនាវដ្តី Der Spiegel ដែលមានឈ្មោះល្បី និង មានឥទ្ធិពលបំផុតមួយនៅប្រទេសអាល្លឺម៉ង់ (អត្ថបទជាភាសាអាល្លឺម៉ង់)។ សូមចែករំលែកមោទកភាពមួយនេះ ជូនចំពោះប្រជាជនខ្មែរគ្រប់ៗរូបផង»៕
