រវល់តំណាងកម្ពុជាច្រៀងនៅក្រៅប្រទេស! ប៉ាច គីមមួយ ត្រូវជនឆ.បោកយកឈ្មោះទៅបង្កើតគណនីក្លែងក្លាយ ដើរខ្ចីលុយមិត្តស្និទ្ធស្នាល

ថ្មីៗនេះ ស្របពេលតារាចម្រៀង ប៉ាច គីមមួយ កំពុងបំពេញបេសកកម្មតំណាងកម្ពុជាសម្ដែងចម្រៀងក្នុងព្រឹត្តិការណ៍ប្រគំតន្ត្រីមិត្តភាពអាស៊ាន ឆ្នាំ ២០២៥ នៅប្រទេសម៉ាឡេស៊ី អ្វីដែលធ្វើឱ្យមហាជនបានចាប់អារម្មណ៍ភ្ញាក់ផ្អើល ខណៈបានឃើញនាងបង្ហោះសារមួយ ប្រកាសថាមានអ្នកយកឈ្មោះរបស់ខ្លួនបង្កើតគណនី Telegram ក្លែងក្លាយឆាតខ្ចីលុយមិត្តស្និទ្ធស្នាលរបស់នាង។

ការបង្ហោះជូនដំណឹងនោះ បានឱ្យដឹងថា កញ្ញា ប៉ាច គីមមួយ ត្រូវបានជនឆបោកយកឈ្មោះរបស់នាងទៅបង្កើតគណនីតេលេក្រាមឈ្មោះ «ប៉ាច គីមមួយ ហង្សមាស» និង បានឆាតទៅខ្ចីលុយកញ្ញា កុយ អេនណា ចំនួន ៥០០ ដុល្លារ ប៉ុន្តែពុំបានសម្រេចឡើយ ខណៈកញ្ញា កុយ អេនណា បានខលសួរនាំនាងជាមុន។ ក្នុងនោះ កញ្ញា ប៉ាច គីមមួយ ក៏បានបញ្ជាក់ថាឈ្មោះគណនី «ប៉ាច គីមមួយ ហង្សមាស» នេះ មិនមែនជាគណនីរបស់នាងទេ ដូចនេះបើមានការឆាត ឬខលខ្ចីលុយ សូមបងប្អូន មិត្តភក្តិប្រុងប្រយ័ត្នកុំចាញ់បោកឱ្យសោះ។

សារនោះ កញ្ញា ប៉ាច គីមមួយ បានបង្ហោះរៀបរាប់ជូនដំណឹងថា ៖ «ជម្រាបសួរបងប្អូន ថ្ងៃនេះ កញ្ញា Koy Anna បាន call មកខ្ញុំសួរថា តើនេះជា acc Telegram បងមែនអត់ ព្រោះថាឆាតមកខ្ចីលុយចំនួន 500$។ ចង់បញ្ជាក់ប្រាប់បងប្អូនថា អាខោនឈ្មោះ (ប៉ាចគីមមួយ ហង្សមាស) មិនមែនជាអាខោននាងខ្ញុំទេ បើមានការខលខ្ចីលុយ-ល- បងប្អូនសូមកុំចាញ់បោក ព្រោះ telegram ពិតប្រាកដខ្ញុំមានតែមួយគត់ លេខ 069668996 ហេងដែរ Anna បាន call មកសួរនាំមុន កុំអីចាញ់បោកគេបាត់ហើយ ដូច្នេះសូមបងប្អូន ក៏ដូចជាមិត្តភក្ដិស្និទ្ធស្នាលទាំងអស់ប្រយ័ត្នមានជនឆបោកបន្លំជាខ្ញុំទៅខ្ចីលុយអ្នកទាំងអស់គ្នា ហើយអរគុណ Anna ដែលបានជូនដំណឹង»៕