កាលពីថ្ងៃទី ១០ ខែធ្នូ ឆ្នាំ ២០២៤ កន្លងទៅ មានហេតុការណ៍ដ៏រន្ធត់មួយបានកើតមានឡើងនៅទីតាំងទេសចរណ៍ដ៏ល្បីមួយប្រចាំកោះបាលី Sacred Monkey Forest Sanctuary ដោយសុខៗដើមឈើដ៏ធំបានបាក់រលំភ្លាមៗ រហូតបណ្ដាលឱ្យមានអ្នកស្លាប់ចំនួន ២ នាក់ និង រងរបួសធ្ងន់ធ្ងរម្នាក់។
តាមព័ត៌មានបានឱ្យដឹងថា ជនរងគ្រោះដែលបានស្លាប់ម្នាក់ជាអ្នកទេសចរសញ្ជាតិបារាំងឈ្មោះ F Justine Christine អាយុ ៣២ ឆ្នាំ និង ម្នាក់ទៀតជាជនជាតិកូរ៉េខាងត្បូងឈ្មោះ Kim Hyoeun អាយុ ៤២ ឆ្នាំ ខណៈជនរងគ្រោះដែលរងរបួសធ្ងន់គឺជាជនជាតិកូរ៉េខាងត្បូងឈ្មោះ Lee Sunni អាយុ ៤៣ ឆ្នាំ។
តាមរយៈវីដេអូស្ដែងៗដែលបង្ហោះចែកចាយលើបណ្ដាញសង្គមហ្វេសប៊ុកបានបង្ហាញឱ្យឃើញ ក្រុមអ្នកទេសចរកំពុងដើរកម្សាន្តជុំវិញទីតាំងទេសចរណ៍នោះមុនពេលពួកគេងាកក្រោយហើយក៏ស្ទុះរត់គេចចេញភ្លាមៗក៏ព្រោះតែដើមឈើយ៉ាងធំមួយដើមបានធ្លាក់ចុះមកមួយទំហឹងតែម្ដង។ ខណៈអ្នកទេសចរដទៃអាចរត់គេចចេញទាន់ ជនរងគ្រោះទាំង ៣ ខាងលើគឺគេចមិនរួចឡើយដោយត្រូវដើមឈើសង្កត់លើចំតែម្ដងរហូតដល់ជួបរឿងអកុសល និង រន្ធត់បែបនេះ។
គួរឱ្យដឹងផងដែរថា បើតាមសេចក្ដីបញ្ជាក់ពីអ្នកគ្រប់គ្រងទូទៅនៃដែនជម្រកខាងលើ បានប្រាប់ថាការបាក់រលំដើមឈើភ្លាមៗនោះគឺដោយសារតែកម្លាំងខ្យល់បោកបក់ពេលនោះខ្លាំងពេក។ ក្រោយហេតុការណ៍ ទីតាំងនោះដែរត្រូវបានប្រកាសបិទចំនួន ២ ថ្ងៃ (ថ្ងៃទី ១១-១២ ខែធ្នូ) ហើយបានធ្វើការណែនាំដល់ភ្ញៀវទេសចរទាំងអស់ឱ្យមានការប្រុងប្រយ័ត្នខ្ពស់ពេលចូលទៅក្នុងតំបន់អំឡុងពេលអាកាសធាតុមានភ្លៀងធ្លាក់៕
ប្រភព៖ World Of Buzz
