កាលពីព្រឹកថ្ងៃទី ២២ ខែឧសភា ឆ្នាំ ២០២៥ កន្លងទៅ (ពេលវេលាក្នុងតំបន់) មានហេតុការណ៍ធ្លាក់យន្តហោះដ៏រន្ធត់មួយដោយយន្តហោះឯកជន Cessna 550 មួយគ្រឿងបានផ្ទុះឆេះសន្ធោសន្ធៅក្រោយធ្លាក់លើផ្ទះពលរដ្ឋក្នុងក្រុង San Diego សហរដ្ឋអាមេរិក។ យន្តហោះធន់តូចមួយគ្រឿងនោះមានផ្ទុកអ្នកដំណើរទាំងអស់ ៦ នាក់ (ស្លាប់ទាំងអស់) បានជួបបញ្ហាអាកាសធាតុចុះអ័ព្ទខ្លាំងហើយក៏ទាក់ជាមួយនឹងខ្សែភ្លើងរហូតធ្លាក់ផ្ទុះឆេះតែម្ដង។
ក្នុងចំណោមជនរងគ្រោះដែលបានស្លាប់ក្នុងហេតុការណ៍ធ្លាក់យន្តហោះដែរក៏មានលោក Daniel Williams ដែលជាដៃស្គរក្នុងក្រុមតន្ត្រីដ៏ល្បី The Devil Wears Prada ផងដែរ។ លោក Williams ត្រូវបានឱ្យដឹងថាបានឡើងយន្តហោះ Cessna 550 នៅព្រលានយន្តហោះ Teterboro នាក្រុង New Jersey កាលពីយប់ថ្ងៃទី ២១ ខែឧសភា ឆ្នាំ ២០២៥ ហើយបើតាមទិន្នន័យអាកាសចរណ៍ យន្តហោះមួយគ្រឿងនោះដែលមានកន្ទុយលេខ N666DS បានហោះចេញពីព្រលាននៅវេលាម៉ោង ១១ និង ១៥ នាទីយប់។ យន្តហោះបានឈប់នៅក្រុង Wichita រដ្ឋ Kansas ដើម្បីចាក់សាំង មុនបន្តហោះហើរឆ្ពោះទៅ California។
គួរឱ្យដឹងផងដែរថា យន្តហោះ Cessna 550 បានធ្លាក់នៅរយៈចម្ងាយប្រមាណត្រឹមជាង ៣ គីឡូម៉ែត្រពីព្រលាន Montgomery-Gibbs Executive ក្នុងក្រុង San Diego ដោយយន្តហោះបានផ្ទុះឆេះយ៉ាងសន្ធោសន្ធៅបំផ្លាញផ្ទះពលរដ្ឋអស់ ១៥ ខ្នង រួមទាំងយានយន្តមួយចំនួនក្នុងតំបន់នោះផងដែរ៕
