នៅថ្ងៃទី ០៤ ខែមករា ឆ្នាំ ២០២៥ នេះ សារព័ត៌មាន Next Apple បានចេញផ្សាយដំណឹងដ៏រន្ធត់មួយដោយតារាចម្រៀងតៃវ៉ាន់ម្នាក់ឈ្មោះ Lawai Arik បានជួបគ្រោះថ្នាក់ធ្លាក់ពីលើរន្ទាកម្ពស់ ២០ ម៉ែត្ររហូតបាត់បង់ជីវិតក្នុងវ័យ ៣៦ ឆ្នាំ ខណៈរូបលោកកំពុងជួយរៀបចំឆាកសម្ដែងដើម្បីត្រៀមអបអរឆ្លងឆ្នាំថ្មីនៅក្រុងតៃប៉ិ។
តាមព័ត៌មានបានឱ្យដឹងថា ហេតុការណ៍គ្រោះថ្នាក់ខាងលើបានកើតឡើងកាលពីថ្ងៃទី ២៥ ខែធ្នូ ឆ្នាំ ២០២៤ កន្លងទៅ ដោយលោក Lawai Arik បានជួបគ្រោះធ្លាក់ពីលើរន្ទាអំឡុងពេលរូបលោកកំពុងទទួលជួយរៀបចំភ្លើងលើឆាក។
តាមមិត្តភក្តិរបស់តារាចម្រៀង Lawai Arik បាននិយាយថា អ្នករៀបចំកម្មវិធីមិនបានពន្យល់ពីមូលហេតុនៃគ្រោះថ្នាក់នេះដល់ក្រុមគ្រួសាររបស់ Lawai ឡើយ។ ជាងនេះទៅទៀត ការរៀបដំឡើងឆាកមិនបានផ្អាកសិនឡើយ តែខាងអ្នករៀបចំនៅទទួលបានការអនុញ្ញាតឱ្យបន្តរៀបចំក្រោយហេតុការណ៍គ្រោះថ្នាក់កើតឡើងបាន ២៤ ម៉ោង។
មរណភាពភ្លាមៗរបស់ Lawai Arik បានធ្វើឱ្យក្រុមគ្រួសារ និង មិត្តភក្តិរបស់លោកមានការឈឺចាប់ និង សោកស្ដាយជាខ្លាំង។ ថ្ងៃបុណ្យគ្រីសម៉ាស់ និង ឆ្លងឆ្នាំចាប់ពីពេលនេះទៅនឹងក្លាយជាពេលវេលាដ៏សោកសៅបំផុតមួយសម្រាប់សាច់ញាតិក្រុមគ្រួសារ និង មិត្តភក្តិរបស់លោក។
គួរបញ្ជាក់ថា ពិធីបុណ្យសពតារាចម្រៀង Lawai Arik នឹងត្រូវក្រុមគ្រួសាររៀបចំធ្វើឡើងនៅថ្ងៃទី ០៨ ខែមករា ឆ្នាំ ២០២៥ ខាងមុខនេះ៕
