រដ្ឋមន្ត្រីក្រសួងអប់រំ លើកឡើងពីបេក្ខជន ខេត្តព្រះវិហារ និង ឧត្តរមានជ័យ អាចមានសំណាងក្នុងការប្រឡង ព្រោះក្រសួងមានវិធានការថ្មី

នៅរសៀលថ្ងៃទី ២២ ខែសីហា ឆ្នាំ ២០២៥ នេះ ក្រសួងអប់រំយុវជន និង កីឡា បានធ្វើសន្និសីទសារព័ត៌មានស្ដីពី «ដំណើរការរៀបចំការប្រឡងសញ្ញាបត្រមធ្យមសិក្សាទុតិយភូមិ» សម័យប្រឡង ២៨ សីហា ២០២៥។

តាមរយៈសន្និសីទសារព័ត៌មាន រដ្ឋមន្ត្រីក្រសួងអប់រំយុវជន និង កីឡា ឯកឧត្តម ហង់ ជួនណារ៉ុន បានមានប្រសាសន៍ជម្រាបជូនឱ្យបានដឹងថា ៖ «ខេត្តទាំង ២ គឺខេត្តឧត្តរមានជ័យ និង ខេត្តព្រះវិហារ សរុបទៅបេក្ខជនជិត ៤ ពាន់នាក់ គឺយើងមានជម្រើសច្រើន ប៉ុន្តែយើងនៅតែចង់ឱ្យគាត់រៀន ទីមួយគឺយើងនៅតែចង់ឱ្យគាត់រៀន ទី ២ ខំរៀនដើម្បីចាប់យកចំណេះដឹងបន្តទៀត អ៊ីចឹងគឺរក្សាឱ្យមានការប្រឡងដដែល»។

ឯកឧត្តមរដ្ឋមន្ត្រីបានបន្តថា ៖ «ដោយឡែកចំពោះខេត្តទាំងពីរ ក្រសួងនឹងមានវិធានការពិសេសដើម្បីកុំឱ្យសិស្សយើងរងគ្រោះពីសង្គ្រាម អ៊ីចឹងយើងនឹងមានវិធានការជួយជារួមគឺ មិនប្រាប់ថាម៉េចទេ ប៉ុន្តែលោកជឿជាក់ថាបេក្ខជននឹងពេញចិត្តចំពោះវិធានការនេះ ដោយសារតែក្រសួងនឹងជួយយ៉ាងណាឱ្យគាត់អាចជាប់ ហើយអ្នកដែលពូកែនឹងទទួលបាននិទ្ទេស ហើយគាត់នឹងអាចបន្តការសិក្សានៅកម្រិតឧត្តមសិក្សា ហើយក្រសួងនឹងផ្ដល់អាហារូបករណ័បន្ថែមទៀត ចាំអ៊ុតលទ្ធផលថាក្រសួងនឹងមានវិធានការអ្វី»៕

សូមចុចទីនេះដើម្បីទស្សនាវីដេអូ