ការធ្វើការប្រកាន់ខ្ជាប់វិជ្ជាជីវៈ រមែងបង្ហាញពីកម្រិតជំនាញ ចំណេះដឹង ភាពបត់បែន ជាពិសេស វាអាចជាប្រយោជន៍ទទួលបានឱកាសធំនៅថ្ងៃមុខ។ ការរក្សាភាពវិជ្ជាជីវៈគឺជាគន្លឹះដ៏សំខាន់សម្រាប់ការរីកចម្រើនក្នុងអាជីព និង ការបង្កើតបរិយាកាសការងារប្រកបដោយការគោរព។ ខាងក្រោមនេះគឺជាគន្លឹះសំខាន់ៗមួយចំនួន ដើម្បីរក្សាភាពវិជ្ជាជីវៈនៅកន្លែងធ្វើការ៖
១. ឥរិយាបថ និង ការប្រព្រឹត្ត
* គោរពពេលវេលា: មកដល់កន្លែងធ្វើការ និង ចូលរួមប្រជុំទាន់ពេល។ ការមកយឺតបង្ហាញពីការមិនគោរពពេលវេលារបស់អ្នកដទៃ។
* មានស្មារតីទទួលខុសត្រូវ: ធ្វើការងារ និង បំពេញកិច្ចការតាមការប្តេជ្ញាចិត្ត ហើយបញ្ជូនតាមកាលកំណត់។ ទទួលខុសត្រូវចំពោះកំហុសឆ្គងរបស់អ្នកដោយមិនបន្ទោសអ្នកដទៃ។
* គ្រប់គ្រងអារម្មណ៍: រក្សាភាពស្ងប់ស្ងាត់ និង សុភាពរាបសារ ទោះស្ថិតក្នុងស្ថានភាពតានតឹង ឬ មានជម្លោះក៏ដោយ។ ជៀសវាងការបង្ហាញអារម្មណ៍ផ្ទាល់ខ្លួនហួសហេតុនៅកន្លែងសាធារណៈ។
* រក្សាការសម្ងាត់: កុំទម្លាយព័ត៌មានសម្ងាត់របស់ក្រុមហ៊ុន អតិថិជន ឬ មិត្តរួមការងារ។
២. ការទំនាក់ទំនង
* ប្រើភាសាសមរម្យ: ប្រើប្រាស់ពាក្យពេចន៍គួរសម សុភាព និង ច្បាស់លាស់ក្នុងការសន្ទនាផ្ទាល់មាត់ អ៊ីម៉ែល ឬ ឯកសារផ្លូវការ។ ជៀសវាងពាក្យស្លោក ឬ ភាសាអសុរោះ។
* ចៀសវាងការនិយាយដើម: ដកខ្លួនចេញពីក្រុមដែលចូលចិត្តនិយាយដើម ឬ ចូលរួមក្នុងរឿងនយោបាយក្នុងការិយាល័យ។ ផ្តោតតែលើកិច្ចការ និង ដំណោះស្រាយ។
* ស្តាប់ដោយយកចិត្តទុកដាក់: នៅពេលប្រជុំ ឬ ជជែកគ្នា ត្រូវស្តាប់អ្នកដទៃដោយយកចិត្តទុកដាក់ និង ឆ្លើយតបដោយគោរព។
៣. រូបរាង និង សម្លៀកបំពាក់
* ស្លៀកពាក់ឱ្យសមរម្យ: ស្លៀកពាក់ឱ្យត្រូវតាមច្បាប់របស់ក្រុមហ៊ុន ឬ តាមលក្ខណៈវិជ្ជាជីវៈរបស់វិស័យការងាររបស់អ្នក។
* រក្សាអនាម័យផ្ទាល់ខ្លួន: រក្សាខ្លួនប្រាណ និង សម្លៀកបំពាក់ឱ្យស្អាតបាត និង មានរបៀបរៀបរយជានិច្ច។
៤. ក្រមសីលធម៌ការងារ
* គោរពគំនិតអ្នកដទៃ: ទទួលស្គាល់ និង គោរពភាពខុសគ្នានៃយោបល់ ជំនឿ ឬ វប្បធម៌របស់មិត្តរួមការងារ។
* ស្វែងរកដំណោះស្រាយ: នៅពេលលើកឡើងបញ្ហា គួរតែភ្ជាប់ជាមួយនឹងសំណូមពរដំណោះស្រាយដែលអាចធ្វើទៅបាន ដើម្បីបង្ហាញពីភាពជាម្ចាស់ការ។
* បែងចែកជីវិតផ្ទាល់ខ្លួន និង ការងារ: កុំយកបញ្ហាផ្ទាល់ខ្លួនមកលាយឡំជាមួយកិច្ចការការងារ ឬ រអ៊ូរទាំពីបញ្ហាគ្រួសារច្រើនពេកនៅកន្លែងធ្វើការ៕
ប្រភព៖ ឯកសារច្បាប់ និង រដ្ឋបាល
