រាត្រីឆ្លងឆ្នាំ ជាឱកាសដ៏រីករាយមួយ ដែលគូស្នេហ៍មិនគួររំលងក្នុងការបង្កើតអនុស្សាវរីយ៍ជាមួយគ្នា។ ជាការពិត អនុស្សាវរីយ៍នេះហើយ ដែលធ្វើឱ្យចំណងស្នេហ៍កាន់តែផ្អែមល្ហែម និង រឹងមាំ។ បើគូស្នេហ៍មិនទាន់ដឹងទៅណា យើងសូមណែនាំសកម្មភាព ៣ យ៉ាង ដែលជាការបង្កើតអនុស្សាវរីយ៍ចងចាំល្អបំផុតគ្មានថ្ងៃភ្លេច។
១. ទទួលទានអាហារក្រោមពន្លឺភ្លើងទៀន
ការទទួលទានអាហារនៅផ្ទះក្រោមពន្លឺភ្លើងទៀន ជាពេលវេលាមួយដ៏រ៉ូមែនទិក និង កក់ក្តៅបំផុត។ រៀបចំអាហារដែលជាចំណូលចិត្ត ឬបើអាចចម្អិនអាហារជាមួយគ្នា។ បង្កើតបរិយាកាសទទួលទានឱ្យកាន់តែពិសេស ដោយបន្ថែមចាក់តន្ត្រីលន្លង់លន្លោច បើកភ្លើងពន្លឺស្រទន់ និង រៀបចំតុបតែងតុអាហារឱ្យអេឡេហ្គង់។ បរិយាកាសបែបនេះ នឹងធ្វើឱ្យអ្នក និង គូស្នេហ៍បានផ្តោតលើគ្នា មានអារម្មណ៍ជ្រាលជ្រៅជាមួយគ្នា ជាជាងការចេញទៅភោជនីយដ្ឋានខាងក្រៅ ដែលមានសំឡេងរំខាន។ បន្ថែមភាពផ្អែមល្ហែមទៀតនោះ អំឡុងបាញ់កាំជ្រួច កុំភ្លេចកាន់ដៃនិយាយពាក្យពេចន៍ស្វីតៗ ផ្តល់ស្នាមថើម ហើយរាំបទរ៉ូមែនទិកពោរពេញដោយអត្ថន័យ។
២. លម្ហែដាច់ដោយឡែក
បើមិនចង់នៅផ្ទះឬទៅកន្លែងមានមនុស្សច្រើន អ្នកអាចឆ្លងឆ្នាំនៅកន្លែងលម្ហែដាច់ដោយឡែកណាមួយ ដូចជានៅសណ្ឋាគារឬរីសត ដែលចោមព័ទ្ធទៅដោយទេសភាពធម្មជាតិស្រស់ថ្លា។ អំឡុងសម្រាកលម្ហែ អ្នកអាចឆ្លៀតឱ្យខាងកន្លែងទីតាំងរៀបចំសកម្មភាពពិសេសៗ ដូចជាការទទួលទានអាហារក្រោមពន្លឺភ្លើងទៀន ទទួលទានអាហារនៅមាត់ទឹក មានតន្ត្រីកំដរ និង មានកាំជ្រួចសម្រាប់បាញ់នៅវិនាទីឆ្លងឆ្នាំ។
៣. មើលកាំជ្រួចពីរនាក់
បើចង់មើលកាំជ្រួចច្បាស់ អ្នកអាចធ្វើការកក់បន្ទប់សណ្ឋាគារណាមួយ ដែលមើលឃើញទិដ្ឋភាពកាំជ្រួចពេញភ្នែក។ ជាពិសេស បន្ទប់ដែលមានរានហាលបែរមុខទៅទីតាំងបាញ់កាំជ្រួចតែម្តង។ បើចង់អ៊ូអរលើអាកាស អាចឡើងទៅស្កាយបារ ហើយបើចង់ស្រស់ថ្លាលើផ្ទៃទឹក អាចជិះទូកមើលកាំជ្រួច ដែលថ្ងៃឆ្លងឆ្នាំនេះ ទូកមួយចំនួនក៏មានរៀបចំកម្មវិធីជប់លៀងពីល្ងាចរហូតដល់រាត្រីឆ្លងឆ្នាំផងដែរ៕
