ថ្មីៗនេះ នៅក្នុងបណ្តាញសង្គមរបស់ប្រទេសចិន កំពុងតែមានការហួសចិត្តទៅលើរឿងរ៉ាវស្រ្តីចំណាស់វ័យ ៨២ ឆ្នាំម្នាក់ ដែលបានលេបកង្កែបទាំងរស់ចំនួន ៨ ក្បាល ដោយជឿថាអាចព្យាបាលអាការឈឺខ្នងបាន តែមានអីចុងក្រោយធ្ងន់ធ្ងរលើសដើម។
តាមព័ត៌មានបានឱ្យដឹងថា ស្រ្តីចំណាស់រូបនេះមានអាការៈឈឺខ្នងរ៉ាំរ៉ៃ ដោយសារតែការគាបសរសៃឆ្អឹងខ្នងជាយូរមកហើយ ទើបសម្រេចចិត្តថាធ្វើតាមវិធីព្យាបាលតាមជំនឿបុរាណម្តង គឺជាការលេបកង្កែបទាំងរស់ចំនួន ៨ ក្បាល ដោយជឿថាអាចជួយព្យាបាលបាន។ ក្នុងនោះស្រ្តីចំណាស់រូបនេះបានលេបកង្កែបតូចៗចំនួន ៣ ក្បាលនៅថ្ងៃដំបូង ហើយនៅថ្ងៃបន្ទាប់ក៏បានលេប ៥ ក្បាលទៀត។
យ៉ាងណាមិញ ក្រោយពីនោះមិនបានប៉ុន្មានថ្ងៃ ស្រ្តីរូបនេះស្រាប់តែកើតអាការៈឈឺពោះខ្លាំងរហូតដើរមិនកើត ដែលធ្វើឱ្យកូនប្រុសភ័យជ្រួលច្របល់ប្រញាប់បញ្ជូនទៅមន្ទីរពេទ្យ។ គ្រូពេទ្យបានរកឃើញថា នៅក្នុងខ្លួនស្រ្តីនេះមានមេរោគប៉ារ៉ាស៊ីតជាច្រើនដែលមាននៅក្នុងពស់ និងកង្កែប ហើយវាបានឆ្លងទៅបំផ្លាញប្រព័ន្ធរំលាយអាហារ។ ដោយឡែក ជាសំណាងល្អ ក្រោយពីចូលមន្ទីរពេទ្យព្យាបាលបាន ២ សប្តាហ៍ ស្រ្តីចំណាស់ក៏បានជាសះស្បើយ និងអាចត្រឡប់ទៅផ្ទះវិញបាន៕
