ថ្មីៗនេះ មានក្មេងប្រុសអាយុ ៦ ឆ្នាំម្នាក់ នៅប្រទេសម៉ាឡេស៊ី សង្ស័យត្រូវបងប្រុសបង្កើតអាយុ ៩ ឆ្នាំ យកកូនកាំបិតអារ-ករងរបួសធ្ងន់ធ្ងរ ព្រោះតែខឹងរឿងធ្វើឱ្យខូចទូរស័ព្ទបណ្ដាលឱ្យរូបគេខាតបង់ពិន្ទុអស់ ១ លានលើហ្គេម Roblox។
ជុំវិញករណីដ៏រន្ធត់មួយនេះដែរ ខាងសហព័ន្ធកីឡា E-sport ប្រចាំប្រទេសម៉ាឡេស៊ី (MESF) បានធ្វើការឆ្លើយតបភ្លាមៗ ដោយប្រកាសថា ពួកគេនឹងដាក់ចេញគោលការណ៍សុវត្ថិភាពឌីជីថល ក្នុងនោះរួមមានទាំងហ្គេម Roblox ផងដែរ ដើម្បីការពារសុវត្ថិភាពក្មេងៗឱ្យបានល្អជាងមុនលើកម្មវិធីអនឡាញ។
យោងតាមសារព័ត៌មាន Berita Harian លោកប្រធានសហព័ន្ធកីឡា E-sport ប្រចាំប្រទេសម៉ាឡេស៊ី Muhammad Naim Al Amin Saharudin បានលើកឡើងថា គំនិតផ្តួចផ្ដើមនេះគឺបានដាក់ចេញបន្ទាប់ពីការប្រជុំជាមួយរដ្ឋមន្ត្រីក្រសួងយុវជន និង កីឡា Hannah Yeoh រួមទាំងអ្នកតំណាងមកពីខាងហ្គេម Roblox។
លោកប្រធាន MESF បានបកស្រាយបន្ថែមទៀតថា ចំណុចចម្បងនៃបញ្ហាដែលបានលើកយកមកនិយាយរួមមាន ហានិភ័យនៃការប៉ះពាល់នឹងអំពើអនាចារ ការគំរាមកំហែងតាមអ៊ីនធឺណែត ការញៀនហ្គេម ការកេងប្រវ័ញ្ចលើអ៊ីនធឺណែត និង មាតិកាមិនសមរម្យ ដែលតែងកើតមានឡើងដោយសារតែកង្វះការពិនិត្យពីឪពុកម្ដាយ។ លោកបានបន្ថែមទៀតថា បើទោះជាកម្មវិធីហ្គេមខ្លះមិនចាត់ចូលក្នុង E-sport ក៏ពិតមែន ខាង MESF នៅតែប្តេជ្ញាក្នុងការជួយកាត់បន្ថយហានិភ័យ និង អាកប្បកិរិយាមិនល្អលើក្មេងៗដែលលេង៕
ប្រភព៖ World Of Buzz
