អាកាសធាតុក្តៅ រាងកាយមនុស្សយើងងាយប្រឈមបញ្ហាច្រើនប៉ះពាល់ទាំងអារម្មណ៍ និង សុខភាព។ ជាក់ស្តែង សូម្បីការមិនស្លៀកខោក្នុង ឬលីអូក៏អាចបង្កផលប៉ះពាល់ផ្សេងៗ ស្ទើរមិននឹកស្មានដល់ផងដែរ។ ដូចនេះ សម្រាប់អ្នកមិនទម្លាប់ស្លៀកខោក្នុង អាចនឹងប្រឈមបញ្ហា ៥ យ៉ាងដូចជា៖
១. បែកញើសច្រើន និង មិនស្រណុកខ្លួន៖ ដោយគ្មានខោក្នុង វាមិនបានស្រូបញើស និង សំណើម ដែលហូរចេញពីស្បែកឡើយ។ វានឹងធ្វើឱ្យយើងកើតអារម្មណ៍មិនសូវស្រណុក បាត់បង់ទំនុកចិត្ត បែកញើសកាន់តែច្រើន ជាពិសេសអ្នកស្លៀកខោពណ៌អាចនឹងឃើញញើសជោគច្បាស់ៗនៅត្រង់តំបន់សម្ងាត់។
២. កើតរមាស់ និង រលាក៖ ការកកិតស្បែកនឹងសម្លៀកបំពាក់ ជាពិសេសនៅតំបន់ផ្អឹបសាច់អាចបង្កជារលាក ឡើងក្រហម រោលរមាស់។ បញ្ហានេះវាកើតឡើងពីកម្តៅខាងក្រៅផង និង កម្តៅពីក្នុងខ្លួនផង។
៣. ធុំក្លិន និង បង្កបាត់តេរី៖ ការបែកញើសនៅតំបន់សម្ងាត់បានផ្តល់ជាឱកាសដល់បាក់តេរីលូតលាស់លឿនបំផុត ដែលជាករណីបង្កទៅជាក្លិនមិនល្អកើតឡើង។ បើមិនស្លៀកខោក្នុង ហើយប្រឈមនឹងអាកាសធាតុក្តៅទៀតនោះ ច្បាស់ណាស់សឹងថាក្លិននឹងកើនឡើងភាយចេញមកក្រៅ។
៤. ងាយឆ្លងមេរោគពីខាងក្រៅ៖ ខោក្នុងត្រូវបានធ្វើឡើងដើម្បីការពាររវាងរាងកាយ និង សម្លៀកបំពាក់ពីខាងក្រៅ វាជួយរក្សាអនាភ័យទប់ញើសដែលហូរចេញមកក្រៅ។ ដោយគ្មានខោក្នុងជារនាំងការពារ ពេលញើសហូរត្រង់តំបន់សម្ងាត់ វានឹងធ្វើឱ្យមេរោគងាយឆ្លងចូលបំផុត។
៥. មិនជួយការពារគ្រប់គ្រាន់៖ ខោក្នុងប្រភេទខ្លះធ្វើឡើងផ្តល់នូវការការពារដល់ប្រដាប់ភេទ ដែលមានអត្ថប្រយោជន៍ខ្ពស់នៅពេលធ្វើសកម្មភាពហាត់ប្រាណ ឬការដើរ និង ឈររយៈពេលយូរ។ ដូច្នេះ ដោយគ្មានខោក្នុងមកការពារ វាធ្វើឱ្យកើតអារម្មណ៍មិនស្រួល ឬធ្វើសកម្មភាពទាំងនោះមិនបានយូរ។ ជួនអាចបង្កហានិភ័យរបួសដល់ប្រដាប់ភេទទៀតផង៕
