មនុស្សជាច្រើនគឺចូលចិត្តផឹកទឹកដូងក្នុងអាកាសធាតុក្ដៅដើម្បីឱ្យត្រជាក់ខ្លួន ប៉ុន្តែការផឹកទឹកដូងច្រើនជាជាងផឹកទឹកចម្រោះធម្មតា ក៏អាចបង្កផលប៉ះពាល់ដល់សុខភាពរបស់យើងផងដែរ។
តាមការបកស្រាយពីវេជ្ជបណ្ឌិតម្នាក់នៅប្រទេសវៀតណាមបាននិយាយថា ក្នុងរដូវក្ដៅ មនុស្សយើងត្រូវការបំបាត់ការស្រេកទឹក បំពេញជាតិទឹកក្នុងខ្លួន និង ធ្វើឱ្យរាងកាយចុះត្រជាក់។ ក្នុងចំណោមទឹកធម្មជាតិទាំងអស់ ទឹកដូងគឺជាជម្រើសពេញនិយមជាងគេព្រោះតែវាមានរសជាតិមិនសូវផ្អែម ងាយស្រួលផឹក បូករួមទាំងផ្ទុកនូវសារធាតុរ៉ែជាច្រើនទៀត។ ផ្លែដូងថ្មីៗមានផ្ទុកទឹករហូតដល់ទៅ ៩៥% សម្បូរទៅដោយពពួកអេឡិចត្រូលីតដូចជា ប៉ូតាស្យូម សូដ្យូម កាល់ស្យូម និង ម៉ាញ៉េស្យូម។ ជាពិសេសនោះ ទឹកដូងមួយកែវចំណុះប្រមាណ ២៤០ មីលីលីត្រគឺមានសារធាតុប៉ូតាស្យូមរហូតដល់ ៦០០ មីលីក្រាម សូដ្យូម ២៥២ មីលីក្រាម កាល់ស្យូម ៥៧.៦ មីលីក្រាម និង ម៉ាញ៉េស្យូម ៦០ មីលីក្រាម។
យ៉ាងណាមិញ បើទោះជាមានសារធាតុចិញ្ចឹមច្រើនខ្លាំងយ៉ាងណាក៏ដោយ ប៉ុន្តែទឹកដូងគឺមិនមែនជាប្រភេទទឹកដែលអាចទទួលទានបានតាមតែចិត្តចង់នោះទេ ជាពិសេសចំពោះអ្នកដែលមានសុខភាពខ្សោយ ឬមានជំងឺរ៉ាំរ៉ៃក្នុងខ្លួន។ តាមការបញ្ជាក់ពីអ្នកជំនាញ អ្នកដែលមានធាតុត្រជាក់ក្នុងខ្លួនដែលជាញឹកញាប់តែងកើតមានបញ្ហាក្រពះ រាករូស បញ្ហារំលាយអាហារ ឬខ្លាចធាតុត្រជាក់ គួរណាស់កុំផឹកទឹកដូងជាប្រចាំ។ ការផឹកទឹកត្រជាក់ក្នុងបរិមាណច្រើនអាចធ្វើឱ្យបញ្ហារំលាយអាហារកាន់តែអាក្រក់ បណ្ដាលឱ្យរាកមិនងាយបាត់ ប៉ះពាល់ការស្រូបយកសារធាតុចិញ្ចឹម និង សុខភាពពោះវៀនមិនល្អផងដែរ។
បន្ថែមពីនេះ ទឹកដូងគឺមិនល្អសម្រាប់ផឹកពេលយប់ឡើយ ព្រោះភាពត្រជាក់ និង ជាតិរ៉ែខ្ពស់របស់វាអាចធ្វើឱ្យដំណើរការរំលាយអាហារថយចុះ នាំឱ្យហើមពោះ និង ពិបាកក្នុងការគេង ជាពិសេសនោះពេលដែលផឹកដាក់ទឹកកក ឬញ៉ាំទាំងសាច់។ ចំពោះអ្នកដែលមានក្រលៀនខ្សោយ ក៏គួរតែប្រយ័ត្នពេលផឹកទឹកដូងផងដែរ ព្រោះថាកម្រិតប៉ូតាស្យូម និង សូដ្យូមខ្ពស់របស់វាអាចប៉ះពាល់ដំណើរការចម្រោះរបស់ក្រលៀន។
ចំពោះការផឹកទឹកដូងឱ្យបានត្រឹមត្រូវ និង មិនប៉ះពាល់ដល់សុខភាព មនុស្សពេញវ័យដែលមានសុខភាពល្អគួរផឹកទឹកដូងមួយថ្ងៃត្រឹមមួយផ្លែបានហើយ និង គួរផឹកនៅអំឡុងពេលថ្ងៃ ឬក្រោយហាត់ប្រាណរួច៕
