តាមរយៈផលិតកម្ម GenMusix កញ្ញា ទាង រតនៈ ឬ មានឈ្មោះនៅក្នុងអាជីពចម្រៀងហៅថា SK នាងគឺជាតារាចម្រៀងកំពុងពេញនិយមក្នុងស្រទាប់យុវវ័យ។ ក្រៅពីអាជីពចម្រៀង នាងក៏កំពុងមានទីផ្សារខ្ពស់ក្នុងវិស័យសម្រស់ និង ហ្វេហ្សិនផងដែរ។ ពិតមែនទៅ អាជីពចម្រៀងបច្ចុប្បន្ន មិនមែនជាអ្វីដែលនាងគ្រោងទុកនោះទេ តែយ៉ាងណា វាបានក្លាយជាវិថីមួយ ដែលនាំឱ្យនាងទទួលបានឱកាសជាច្រើន។
ចាប់កំណើតនៅថ្ងៃទី ២១ ខែ មីនា ស្ថិតក្នុងតារានិករ Aries កញ្ញា ទាង រតនៈ ឬ SK បានចាប់ផ្តើមបោះជំហានចូលក្នុងវិស័យហ្វេហ្សិន មុនក្លាយជាតារាចម្រៀងមានប្រជាប្រិយភាពដូចសព្វថ្ងៃ។ នាងបានសិក្សាផ្នែកច្នៃម៉ូដហ្វេហ្សិន នៅសាលា MAPA បន្ទាប់មកចាប់ផ្តើមអាជីពជាអ្នកថតបង្ហាញម៉ូដសម្លៀកបំពាក់សម្អាងការ និង សម្តែងរឿងខ្លី។
វិថីឆ្ពោះទៅកាន់អាជីពចម្រៀង ហាក់មិនមែនជាអ្វីដែលនាងគ្រោងទុកនោះទេ ពោល វាបានកើតឡើងអំឡុងពេលនាងកំពុងថតបង្ហាញម៉ូដសម្អាងការ ដែលគ្រានោះ មានអ្នកផាត់មុខម្នាក់ បានណែនាំនាងទៅកាន់អ្នកដឹកនាំរឿងម្នាក់ ដែលកំពុងស្វែងរកតួថតសម្រាប់រឿងភាគបែបកូរ៉េ។ នេះហើយជាពេលដំបូង ដែលនាងបានសម្តែង ហើយក៏ជាពេល ដែលនាងបានជួប លោក Step តារាចម្រៀងប្រចាំផលិតកម្ម GenMusix សព្វថ្ងៃ។ លោក Step បានណែនាំនាងទៅកាន់ផលិតកម្ម GenMusix ហើយដោយឃើញនាងមានទេពកោសល្យ និង សក្តានុពលផងនោះ ខាងផលិតកម្មក៏បានដុសខាត់នាងឱ្យក្លាយជាតារាចម្រៀងផ្លូវការតែម្តង។
ក្លាយជាតារាចម្រៀងត្រឹមមួយប៉ប្រិចភ្នែក SK បានចាប់យក និង ប្រើឱកាសនេះអស់ពីចិត្ត។ ក្នុងរយៈពេលដ៏ខ្លី នាងទទួលបានប្រជាប្រិយខ្លាំង មិនថាទាំងសំឡេង រូបសម្រស់ ក៏ដូចជាស្ទីលផ្ទាល់ខ្លួនផងដែរ។ នាងជឿជាក់ថា ការបង្ហាញស្ទីល unique ឬ ស្ទីលដោយឡែកជារបស់ខ្លួន គឺជាផ្នែកមួយដ៏ធំក្នុងការលូតលាស់ ក៏ដូចជាធ្វើឱ្យគេស្គាល់នាងច្បាស់នៅក្នុងវិស័យនេះ។
ទោះដើរហួសខ្ពស់ឆ្ងាយប៉ុនណា SK នាងនៅតែមិនបោះចោលនូវអ្វី ដែលចាប់ផ្តើមពីដំបូង។ ឆ្លៀតពេលពីការថតសំឡេង និង វីដេអូចម្រៀង នាងតែងចូលចិត្តចំណាយពេលស្ងប់ស្ងាត់នៅផ្ទះ គូរ sketch ឌីហ្សាញហ្វេហ្សិនថ្មីៗ ឬ បន្ធូរអារម្មណ៍មើលខ្សែភាពយន្ត។ អាចថា ហ្វេហ្សិន នៅតែសំខាន់សម្រាប់នាង វាអាចឱ្យនាងបញ្ចេញភាពច្នៃប្រឌិត ក្រៅពីតន្ត្រី។ ចំណែកស្ទីលតុបតែងខ្លួនវិញ ជារឿយៗនាងបំផុសគំនិតពីសមាជិកក្រុមចម្រៀងកូរ៉េ (G)I-DLE គឺ Miyeon។
សម្លឹងឆ្ពោះទៅមុខ SK នៅតែមានមហិច្ឆតាជានិច្ច ដោយសង្ឃឹមថា នាងនឹងពង្រឹងជំនាញហ្វេហ្សិន ហើយលូកចូលឱ្យជ្រៅទៅក្នុងឧស្សាហកម្មនេះ។ ចំណែកតន្ត្រី បច្ចុប្បន្ននាងកំពុងត្រៀមខ្លួនសម្រាប់គម្រោងផលិតវីដេអូចម្រៀងជាមួយផលិតកម្ម ដោយនាងបង្ហើបថា ក្នុងនោះនឹងនាំមកជាច្រើននូវភាពច្នៃប្រឌិត និង ថាមពល៕
ប្រភព៖ Prestige
