កាលពីថ្ងៃទី ០២ ខែវិច្ឆិកា ឆ្នាំ ២០២៥ កន្លងទៅនេះ មហាជននិយមតាមដានការប្រកួតបវរកញ្ញាលំដាប់អន្តរជាតិ Miss Universe ច្បាស់ជាបានជ្រាបហើយ ពីដំណើរការនៃការចាប់ផ្តើមប្រកួត Miss Universe 2025។ ក្នុងនោះ បេក្ខភាពបវរកញ្ញាមកពីបណ្តាប្រទេសនានា ក៏បានទៅដល់ប្រទេសថៃហើយដែរ។
យ៉ាងណាមិញ នៅព្រឹកថ្ងៃទី ០៣ ខែវិច្ឆិកា ឆ្នាំ ២០២៥ នេះ ផេកផ្លូវការរបស់ស្ថាប័ន Miss Universe បានចេញសេចក្តីថ្លែងការណ៍ផ្លូវការទាំងព្រឹក ដើម្បីដោះស្រាយ និង បញ្ជាក់ពីការបង្ហោះលើបណ្តាញសង្គមថ្មីៗ ដែលផ្សព្វផ្សាយកម្មវិធី ដែលនិយាយពីការញុំាអាហារពេលល្ងាច និង កម្មវិធីជជែកកម្សាន្តមួយ។
ក្នុងសេចក្តីថ្លែងការណ៍បានបញ្ជាក់ថា ក្រុមការងាររៀបចំ MU សូមរំឭដល់សាធារណជនថា ព្រឹត្តិការណ៍ សកម្មភាព ឬគំនិតផ្តួចផ្តើមតាមបណ្តាញសង្គមណាមួយ ដែលមិនត្រូវបានប្រកាសតាមផេកផ្លូវការរបស់ស្ថាប័ន Miss Universe គឺគ្មានការអនុញ្ញាតទេ ពោលគឺកម្មវិធី និង ព័ត៌មានពិតប្រាកដធ្វើការបង្ហោះឡើងលើផេកផ្លូវការ Miss Universe តែមួយគត់ និង សូមឱ្យបណ្តាផេកនានាលុបចេញជាបន្ទាន់។
គួរជម្រាបថា សេចក្តីថ្លែងការណ៍ខាងលើនេះ បានធ្វើឡើងបន្ទាប់ពីផេក Miss Universe Thailand បានបង្ហោះសារធ្វើការ Vote រកបេក្ខភាព ១០ នាក់ ដើម្បីពិសាអាហារពេលល្ងាចជាមួយ ណាវ៉ាត់។ ជាក់ស្តែង សេចក្តីថ្លែងការណ៍ខាងលើបានធ្វើឡើង គឺក្នុងគោលបំណងបដិសេធទាំងស្រុងពីកម្មវិធី ដែលផេក Miss Universe Thailand បានបង្ហោះ៕
