កាលពីល្ងាចថ្ងៃទី ៥ ខែតុលា ឆ្នាំ ២០២៥ កន្លងទៅនេះ នៅខេត្តណារ៉ាធីវ៉ាត ប្រទេសថៃ មានករណីប្លន់ដ៏សាហាវមួយដែលមិនធ្លាប់មាន ដោយចោរមួយក្រុមគ្នា ៨ នាក់ បានជិះឡានមកប្លន់ហាងលក់មាស ហើយបង្កការចលាចលផ្អើលពេញទាំងស្រុកដូចក្នុងរឿងហូលីវូដ។
តាមព័ត៌មានបានឱ្យដឹងថាចោរមួយក្រុមនេះមានគ្នាចំនួន ៨ នាក់ បានធ្វើដំណើរដោយឡានមួយបាំងកន្លះមួយគ្រឿង ប្រដាប់ទៅដោយអាវុធពេញដៃ បានចុះមកប្លន់នៅហាងមាសមួយកន្លែងស្រុកស៊ូង៉ៃកូឡុក ខេត្តណារ៉ាធីវ៉ាត។ ក្នុងនោះ ក្រុមចោរបានចែកគ្នាប្រតិបត្តិការសកម្មភាព ដោយបានយកកាំភ្លើងភ្ជង់សន្តិសុខ រួចក៏បានចូលទៅគំរាមប្លន់បុគ្គលិកនៅក្នុងហាង ហើយក៏បានប្រមូលយកមាសដែលដាក់តាំងនៅក្នុងទូទាំងអស់។ លើសពីនេះក៏បានបាញ់ប្រហារទៅលើទាហានម្នាក់ ដែលកំពុងតែទិញអីវ៉ាន់ឱ្យរបួសអស់ចំនួន ៣ គ្រាប់ និងចាប់ខ្លួនបុរសម្នាក់វ័យ ៣០ ឆ្នាំជាចំណាប់ខ្មាំង តែក៏បានដោះលែងទៅវិញ។
យ៉ាងណាមិញ ក្រោយពីប្រព្រឹត្តសកម្មភាពរួច ក្រុមចោរក៏បានឡើងឡានគេចខ្លួន ដោយខណៈគេចខ្លួននោះក្រុមចោរបានទម្លាក់ធុងហ្គាសកែច្នៃនៅតាមផ្លូវ រួមទាំងដែកគោលយ៉ាងច្រើន ដើម្បីរារាំងការដេញចាប់ពីប៉ូលិស ដែលធ្វើឱ្យឡានប្រជាពលរដ្ឋជាច្រើនបានខូចខាត។ ដោយឡែក មកទល់ពេលនេះ ខាងប៉ូលិសអាជ្ញាធរនៅមិនទាន់ចាប់ក្រុមចោរបាននៅឡើយទេ បានត្រឹមតែប្រកាសឱ្យប្រជាពលរដ្ឋនៅម្តុំនោះមានការប្រុងប្រយ័ត្ន និងពង្រាយកងកម្លាំងបន្ថែមដើម្បីត្រួតពិនិត្យនៅតាមផ្លូវផ្សេងៗ៕
ប្រភព៖ Khaosod
