មានរឿងរ៉ាវរបស់ Influencer ជនជាតិថៃវ័យក្មេងម្នាក់ឈ្មោះ Bank ដែលបានបាត់បង់ជីវិត ដោយសារតែការទទួលភ្នាល់ផឹកស្រាប្តូរយកលុយដើម្បីយកទៅចិញ្ចឹមយាយចំណាស់នៅឯផ្ទះ បានធ្វើឱ្យមហាជនកើតការអាណិតជាពន់ពេក។
តាមព័ត៌មានបានឱ្យដឹងថា ឪពុកម្តាយរបស់ Bank បានចែកផ្លូវគ្នាតាំងពីគេអាយុ ២ ឆ្នាំមកម្ល៉េះ ហើយ Bank ក៏បានរស់នៅជាមួយនឹងយាយតាំងពីពេលនោះមក។ ពេលធំដឹងក្តីមក Bank ក៏មិនបានរៀនសូត្រ Bank បានដើរលក់ផ្កា និង ដើរតាមអ្នកធ្វើ Content ល្បីនៅតាមបណ្តាញសង្គម ដើម្បីធ្វើ Content ជាមួយគេប្តូរយកលុយដើម្បីមកចិញ្ចឹមយាយ។ ក្នុងនោះ Bank ត្រូវបានអ្នកធ្វើ Content ជាច្រើននាក់ នាំគ្នាលេងសើចមាក់ងាយ និង ធ្វើបាបទៅលើរាងកាយ Bank រហូតដល់ការធ្វើ Content ចុងក្រោយនេះ ដែល Bank បានបាត់បង់ជីវិត។
យ៉ាងណាមិញ ក្រោយពីបានស្លាប់ទៅ ម្តាយរបស់ Bank ក៏បានលេចមុខវែកញែកនៅក្នុងរឿងនេះ ដែលធ្វើឱ្យមហាជនជាច្រើនហាក់ដូចជាមិនពេញចិត្តឡើយ ព្រោះមិនឃើញម្តាយរូបនេះនៅចិញ្ចឹមមើលថែកូនប្រុសឡើយ លុះដល់គេស្លាប់ហើយទើបចេញមុខមក។ មហាជននាំគ្នាព្រួយខ្លាចម្តាយរូបនេះ មានបំណងយកប្រាក់ជំនួយដែលសប្បុរសជនអាណិត Bank ទុកជារបស់ខ្លួនឯង តែយ៉ាងណាក៏ដោយលុយទាំងនោះក៏បានធ្លាក់ទៅជារបស់យាយ Bank ទាំងអស់ទៅហើយ៕
ប្រភព៖ Khaosod
