ជនបរទេសមិនតិចទេ កាលណាឈានជើងមកដល់ទឹកដីកម្ពុជា រមែងតែជាប់ចិត្តប្រតិព័ទ្ធនឹងដែនដីសុវណ្ណភូមិដ៏ស្រស់ស្អាត ជាពិសេស ប្រជាជនដ៏កក់ក្តៅ និង វប្បធម៌រស់នៅដ៏ផូរផង់។ ដូចទៅនឹងស្ត្រីជនជាតិជប៉ុនម្នាក់ ហេតុតែស្រលាញ់វប្បធម៌កម្ពុជា នាងបានស្ម័គ្រផ្លាស់ទីមកនៅទីនេះ ដោយបង្កើតជំនួញមួយឈ្មោះថា Very Berry ដែលផ្តោតទៅលើផលិតផលក្នុងស្រុក ផលិតដោយដៃសិប្បករខ្មែរ។
តាមរយៈគេហទំព័រ Very Berry ស្ត្រីជនជាតិជប៉ុន ដែលជាស្ថាបនិករូបនេះ មានឈ្មោះថា គីកូ (Kiko)។ កាលពីឆ្នាំ ២០០១ នាងបានធ្វើដំណើរពីប្រទេសជប៉ុន មកកម្សាន្តប្រទេសកម្ពុជាជាលើកដំបូង ជាកន្លែងដែលនាងត្រូវបានរំជួលចិត្តយ៉ាងខ្លាំង ដោយភាពកក់ក្តៅ និង ភាពសម្បូរបែបនៃវប្បធម៌ក្នុងស្រុក។
ទំនាក់ទំនងរបស់នាងជាមួយប្រជាជនកម្ពុជា បានបំផុសគំនិតឱ្យនាងចង់បង្កើតអ្វីមួយ ដែលមានឥទ្ធពលយូរអង្វែង។ ជាក់ស្តែង មកដល់ឆ្នាំ ២០០៥ នាងបានសម្រេចផ្លាស់ទីមករស់នៅកម្ពុជា ហើយបើកជំនួញមួយឈ្មោះថា Very Berry ជាមួយបេសកកម្ម បង្កើតឱកាសការងារដល់សិប្បករខ្មែរ។
ដោយសង្កេតឃើញអ្នកផលិតសិប្បកម្មជួបបញ្ហាប្រឈម ដោយសារតែការធ្វើចំណាកស្រុកទៅទីក្រុង និង ការផ្លាស់ប្តូរសេដ្ឋកិច្ច គីកូ នាងបានបើកដំណើរការប្រ៊េនមួយឈ្មោះថា Pavanasara ជាផលិតផលធ្វើដោយដៃ និង ផលិតក្នុងស្រុក ដើម្បីផ្តល់ការងារប្រកបដោយស្ថិរភាព និង ក្រមសីលធម៌សម្រាប់ស្ត្រីតាមភូមិ ក៏ដូចជាធានាឱ្យសិប្បកម្មប្រពៃណីរបស់ពួកគេមានការរីកចម្រើនប្រកបដោយនិរន្តរភាព។
ជាលទ្ធផល ផលិតផលត្រូវបានប្រសូតចេញពីដៃសិប្បករខ្មែរ ក្នុងនោះខូឡិកហ្សិនមានច្រើនមុខ រាប់តាំងគ្រឿងលម្អហ្វេហ្សិន រហូតដល់ គ្រឿងដេគ័រគេហដ្ឋាន ដែលមិនប៉ះពាល់បរិស្ថាន។ គ្រប់មុខផលិតផលសុទ្ធតែឆ្លុះបញ្ចាំងពីបេតិកភណ្ឌវប្បធម៌ដ៏សម្បូរបែប និង សិល្បៈហត្ថកម្មកម្ពុជា។
ដើម្បីធានាទាំងភាពត្រឹមត្រូវ និង និរន្តរភាព ការផលិតត្រូវបានរក្សារបៀបធ្វើបែបប្រពៃណី និង វត្ថុធាតុដើមក្នុងស្រុកដូចជា ផ្តៅ កំប្លោក កប្បាស សូត្រ លង់ហិន និង សម្ភារកែច្នៃឡើងវិញ។
ផលិតផលទទួលបានការគាំទ្រកន្លងមកមានដូចជា ក្រមាត្បាញដោយដៃ កាបូបធ្វើពីសម្ភារកែច្នៃឡើងវិញ ផលិតផលប្រេងដូងរក្សាសម្រស់ គ្រឿងអលង្ការលង់ហិន និង គ្រឿងតុបតែងលម្អផ្ទះជាច្រើនទៀត។ ជាមួយគុណភាពខ្ពស់ និង ម៉ូដតែមួយគ្មានពីរ គ្រប់ផលិតផលសុទ្ធតែបង្កប់នូវរឿងរ៉ាវ ដែលពណ៌នាអំពី ប្រពៃណី និរន្តរភាព លើកកម្ពស់ និង គាំទ្រសហគមន៍ក្នុងស្រុក៕
