កាលពីថ្ងៃទី ០២ ខែវិច្ឆិកា ឆ្នាំ ២០២៥ កន្លងទៅ តាមការបញ្ជាក់ពីខាងក្រុមសង្គ្រោះនៅស៊ូដង់បានឱ្យដឹងថា មានមនុស្សរាប់ម៉ឺននាក់បានធ្វើជម្លៀសខ្លួនទៅកាន់ជំរុំ ប៉ុន្តែមានត្រឹមតែប៉ុន្មានពាន់នាក់ប៉ុណ្ណោះដែលអាចភៀសខ្លួនទៅដល់ជំរុំដែលនៅជិតពួកគេបំផុត ចាប់តាំងពីថ្ងៃដែលកងកម្លាំងយោធាប៉ារ៉ាដណ្ដើមកាន់កាប់ទីក្រុង el-Fasher បាន។ ការជាប់គាំងមនុស្សរាប់ម៉ឺននាក់នៅក្នុងទីក្រុងដែលកងកម្លាំងយោធាកាន់កាប់នេះ បង្កជាការព្រួយបារម្ភយ៉ាងខ្លាំងក្លាពីជោគវាសនាពលរដ្ឋស្លូតត្រង់ទាំងនោះ ដែលអាចប្រឈមនឹងការសម្លាប់ ឬធ្វើទារុណកម្មយ៉ាងឃោរឃៅ។
កងកម្លាំងគាំទ្ររហ័ស (RSF) បានដណ្ដើមកាន់កាប់បានតំបន់ភាគខាងលិច Darfur កាលពីសប្ដាហ៍កន្លងទៅ ក្រោយពីបណ្ដេញកងទ័ពស៊ូដង់ជាគូប្រជែងចេញពីក្រុងដែលឡោមព័ទ្ធអស់រយៈពេល ១៨ ខែ។ ចាប់តាំងពីពេលនោះមក ក៏មានរបាយការណ៍ និង វីដេអូជាច្រើនផ្សព្វផ្សាយពីទង្វើដ៏ឃោរឃៅយង់ឃ្នងរបស់ក្រុមយោធា RSF ទៅលើជនស៊ីវិលស្លូតត្រង់ រួមមានការវាយធ្វើបាប ការសម្លាប់ និង ការបំពានផ្លូវភេទ នេះបើយោងតាមការបញ្ជាក់របស់ពលរដ្ឋស៊ូដង់ និង បុគ្គលិកសង្គ្រោះ។ ជនរងគ្រោះដែលបានស្លាប់គឺរួមមានមនុស្សប្រមាណ ៤៦០ នាក់ដែលបានសម្លាប់ក្នុងមន្ទីរពេទ្យផងដែរ បើតាមការបញ្ជាក់ពីអង្គការសុខភាពពិភពលោក។
តាមទីភ្នាក់ងារអន្តោប្រវេសន៍របស់អង្គការសហប្រជាជាតិ បញ្ជាក់កាលពីថ្ងៃទី ០២ ខែវិច្ឆិកា ឆ្នាំ ២០២៥ បានឱ្យដឹងថា ពលរដ្ឋប្រមាណជាង ៨ ពាន់នាក់បានជម្លៀសចេញពីក្រុង el-Fasher កាលពីថ្ងៃទី ០១ និង ថ្ងៃទី ០២ ខែវិច្ឆិកា ហើយបើគិតចាប់តាំងពីក្រុមយោធា RSF កាន់កាប់មក មានចំនួនមនុស្សសរុប ៧០ ៨៩៤ នាក់ បានធ្វើការភៀសខ្លួនចេញ។ យ៉ាងណាមិញ មនុស្សមិនដល់ ៦ ពាន់នាក់ផងអាចភៀសខ្លួនចេញបានមកដល់ជំរុំជិតនោះបំផុតនៅ Tawila នេះបើតាមការបញ្ជាក់របស់ប្រធានក្រុមប្រឹក្សាជនភៀសខ្លួន។
ថ្លែងប្រាប់សារព័ត៌មាន The Associated Press លោកប្រធានក្រុមប្រឹក្សាខាងលើបានរៀបរាប់ថា៖ «ចំនួនគឺនៅតិចតួចណាស់។ ពួកយើងមិនបានឃើញមនុស្សរាប់ម៉ឺននាក់មកតាមអ្វីដែលរំពឹងទុកឡើយ។ ប្រសិនបើមនុស្សនៅតែស្ថិតក្នុងក្រុង el-Fasher វានឹងពិបាកខ្លាំងបំផុតសម្រាប់ពួកគេក្នុងការរស់រានមានជីវិត»៕
ប្រភព៖ PBS News
