ព្រះអើយ! យន្តហោះចម្បាំងកូរ៉េខាងត្បូងធ្វើសមយុទ្ធទម្លាក់គ្រាប់ បែរទម្លាក់ខុសគោលដៅចំផ្ទះពលរដ្ឋរងរបួសមនុស្សច្រើននាក់

កងទ័ពអាកាសប្រទេសកូរ៉េខាងត្បូង បានធ្វើសមយុទ្ធយន្តហោះចម្បាំងទម្លាក់គ្រាប់ពិតប៉ុន្តែបែរជួបបញ្ហាទម្លាក់ចុះខុសគោលដៅទៅចំតំបន់ពលរដ្ឋរស់នៅ បណ្ដាលឱ្យមនុស្ស ១៥ នាក់បានរងរបួស។

តាមមន្ត្រីម្នាក់មកពីអគ្គសេនាធិការចម្រុះរបស់ប្រទេសកូរ៉េខាងត្បូងបានឱ្យដឹងថា កងទ័ពអាកាសតែងតែតម្រូវឱ្យខាងអ្នកបើកយន្តហោះកំណត់គោលដៅមុនហោះចេញ និង អំឡុងពេលហោះហើរ ក៏ដូចជាធ្វើការពិនិត្យឱ្យល្អិតល្អន់លើទីតាំងទម្លាក់គ្រាប់មុនធ្វើប្រតិបត្តិការ ប៉ុន្តែយ៉ាងណានោះពេលនោះ ពួកគេអាចនឹងជួបបញ្ហាបច្ចេកទេសណាមួយ។

កងទ័ពអាកាសកូរ៉េខាងត្បូងបានឱ្យដឹងដែរថា យន្តហោះចម្បាំង KF-16 ២ គ្រឿង បានទម្លាក់គ្រាប់ Mark 82 ចំនួន ៨ នៅព្រឹកនេះអំឡុងពេលធ្វើសមយុទ្ធក្នុងខេត្ត Gyeonggi ដែលមានចម្ងាយប្រមាណ ៣៥-៤០ គីឡូម៉ែត្រពីព្រំប្រទល់ជាមួយប្រទេសកូរ៉េខាងជើង។ យ៉ាងណាមិញ គ្រាប់ទាំងនោះមានធ្លាក់នៅក្រៅតំបន់សមយុទ្ធដោយយ៉ាងហោចណាស់មាន ១ គ្រាប់បានធ្លាក់ចំតំបន់ពលរដ្ឋរស់នៅ និង បានបំផ្លិចបំផ្លាញអគារចំនួន ៧ រួមមានព្រះវិហារមួយខ្នង ថែមបណ្ដាលឱ្យមនុស្ស ១៥ នាក់រងរបួសផងដែរ៕

ប្រភព៖ VN Express