តំបន់ព្រៃឫស្សី Arashiyama ដែលជាទីតាំងទេសចរណ៍ដ៏ល្បីបំផុតមួយនៅទីក្រុង Kyoto ប្រទេសជប៉ុន បច្ចុប្បន្នកំពុងជួបស្ថានភាពគួរឱ្យបារម្ភខ្លាំង ដោយសារដើមឫស្សីរាប់រយដើមក្នុងតំបន់ព្រៃនោះ ត្រូវភ្ញៀវទេសចរនាំគ្នាឆ្លាក់ឈ្មោះ និង រូបផ្សេងៗ បង្កជាការខូចខាតធ្ងន់ធ្ងរដល់សោភណ្ឌភាព និង សុខភាពរុក្ខជាតិដ៏ស្រស់ស្អាតនេះ។
តាមស្ថិតិចុងក្រោយបង្អស់ដែលទទួលបាន ដើមឫស្សីជាង ៣៥០ ដើម មានឃើញឆ្លាក់ឈ្មោះ និង រូបភាពនានា ធ្វើឱ្យអ្នកជំនាញកាន់តែបារម្ភខ្លាំងថាព្រៃឫស្សីនេះ អាចនឹងទន់ខ្សោយ ដួលរលំ និង បង្កគ្រោះថ្នាក់ដល់អ្នកចូលទស្សនា។
ជាមួយស្ថានកាណ៍បែបនេះដែរ ខាងរដ្ឋាភិបាលក្រុង Kyoto ក៏បានពិចារណាលើការកាត់ដើមឫស្សីដែលប៉ះពាល់នោះចោល ដើម្បីបញ្ចៀសហានិភ័យគ្រោះថ្នាក់ណាមួយ។ ស្របពេលជាមួយគ្នានោះដែ ក៏មានមតិលើកឡើងជាច្រើនស្នើសុំឱ្យមានការផាកពិន័យតឹងរ៉ឹង និង ការចុះល្បាតមើលជាប្រចាំដើម្បីការពារពីការបំផ្លិចបំផ្លាញតទៅទៀត៕
