ព្រឺសម្បុរ! បុគ្គលិកពេទ្យម្នាក់នៅម៉ាឡេស៊ី ត្រូវខ្មោចស្ត្រីកើតមហារីកលងរាល់ថ្ងៃ ទម្រាំដឹងមូលហេតុលង ភ័យប៉ះសក់ជិត ២ ខែ

ថ្មីៗនេះ មានរឿងរ៉ាវដ៏គួរឱ្យចាប់អារម្មណ៍មួយបានកើតឡើងក្នុងប្រទេសម៉ាឡេស៊ី ដោយបុរសម្នាក់ឈ្មោះ Uncle Kentang បានចែករំលែករឿងគួរឱ្យព្រឺសម្បុរមួយដែលបុគ្គលិកពេទ្យម្នាក់បានជួបប្រទះនឹងវិញ្ញាណចងកំហឹងបង្កសំឡេងអុកឡុកនៅផ្នែកកោសល្យវិច័យ ដែលជាទីតាំងរក្សាសពរបស់នាង ក្រោយសក់ពាក់ដែលនាងធ្លាប់ពាក់កាលនៅរស់ត្រូវបានគេដោះចេញ។

តាមការចែករំលែកលើបណ្ដាញសង្គមហ្វេសប៊ុក បុរសខាងលើបានរៀបរាប់ថា អ្នកស្លាប់គឺជាអ្នកជំងឺមហារីក ហើយអ្វីដែលធ្វើឱ្យគ្រប់គ្នាជឿថានាងពិតជាលងបន្លាចមែននោះ គឺនៅពេលដែលសំឡេងអុកឡុកដែលធ្លាប់ឮចេញពីកន្លែងដាក់សាកសពនាងត្រូវបានស្ងប់ស្ងាត់ទៅវិញ ក្រោយសក់ពាក់របស់នាងត្រូវគេយកមកដាក់ឱ្យវិញមុនពេលធ្វើការបូជា។

រឿងហេតុដំបូងនោះគឺថា ស្ត្រីដែលបានស្លាប់ខាងលើគឺមិនមានសាច់ញាតិនោះឡើយ ដោយគាត់បានស្លាប់កាលពីខែមីនា ឆ្នាំ ២០២៥ កន្លងទៅ ហើយ Uncle Kentang ត្រូវបានគេទាក់ទងហៅឱ្យមកជួយរៀបចំពិធីបូជាឱ្យគាត់។

ពេលនោះហើយដែលបុរសជាបុគ្គលិកផ្នែកកោសល្យវិច័យបានរៀបរាប់រឿងហេតុទាំងអស់ប្រាប់លោក។ បុរសរូបនោះបានថា រាល់ពេលប្រចាំការលោកតែងឮសំឡេងចេញពីកន្លែងដាក់សពជានិច្ច ហើយពេលស៊ើបមើលឱ្យច្បាស់ទៅគឺសំឡេងនោះចេញពីទីតាំងដាក់សពស្ត្រីរូបនោះ។

ប៉ូលិសចាយពេលដល់ជិត ២ ខែក្នុងការស្វែងរកសាច់ញាតិសព ហើយសំឡេងលងបន្លាចនោះគឺនៅតែឮរហូតធ្វើឱ្យបុគ្គលិកពេទ្យមានការភ័យខ្លាចជាខ្លាំង។ ដោយទ្រាំលែងបាន ខាងបុគ្គលិកក៏សម្រេចទៅស្រាវជ្រាវមើលកំណត់ត្រារបស់សព ទើបពួកគេរកឃើញថា សពស្ត្រីនោះធ្លាប់មានពាក់សក់ក្រោយសក់ពិតរបស់នាងជ្រុះអស់ដោយសារការព្យាបាល។

បុគ្គលិកនៅផ្នែកកោសល្យវិច័យគឺមិនបានចាប់អារម្មណ៍លើសក់របស់អ្នកជំងឺឡើយពេលទៅទទួលសព ទើបក្រោយការលងបន្លាចទើបពួកគេចាប់អារម្មណ៍ថា សក់សពទុកចោលនៅគ្រែពេទ្យ ហើយក៏យកមកដាក់ឱ្យសពវិញ។ ចុងក្រោយ សំឡេងដែលធ្លាប់បានឮ ក៏ឈប់ឮទៀត ហើយសពរបស់ស្ត្រីនោះក៏ត្រូវបានបូជាទៅតាមប្រពៃណី៕

ប្រភព៖ World Of Buzz