នៅថ្ងៃទី ២៨ ខែវិច្ឆិកា ឆ្នាំ ២០២៥ នេះ សារព័ត៌មានចិន China Press បានចេញផ្សាយដំណឹងដ៏សោកសៅមួយ ដោយភរិយារបស់តារាប្រុសប្រចាំ TVB លោក Gabriel Harrison បានទទួលមរណភាពទៅហើយកាលពីយប់ថ្ងៃទី ២៧ ខែវិច្ឆិកា ឆ្នាំ ២០២៥ កន្លងទៅ (ពេលវេលាក្នុងតំបន់) ក្រោយទ្រាំទ្រនឹងជំងឺធ្ងន់ធ្ងរទៀតលែងបាន។
ដំណឹងដ៏សោកសង្រេងនេះដែរ បានកើតឡើងក្រោយពេលមិនដល់ ២០ ថ្ងៃផង នៅពេលលោក Gabriel ចេញធ្វើការឡាយវីដេអូលើបណ្ដាញសង្គម យំផងអង្វរផងដល់មហាជនតាមបណ្ដាញសង្គមទាំងអស់ឱ្យជួយសង្គ្រោះជីវិតប្រពន្ធរបស់លោកដែលមានជំងឺក្រិនថ្លើម ព្រោះតែពេលនោះលោកមិនមានថវិកាគ្រប់គ្រាន់ និង ត្រូវការជាចាំបាច់ដើម្បីវះកាត់ឱ្យប្រពន្ធ។
យ៉ាងណាមិញ ក្រោយមកលោកក៏ទទួលបានការជួយពីមិត្តរួមសិល្បៈជាមួយគ្នាជាច្រើន ក្នុងនោះរួមមានទាំងតារាសម្ដែង Louis Koo, Aaron Kwok និង Eric Tsang ជាដើម រួមទាំងមហាជនដែលអាណិតស្រឡាញ់រូបលោកមួយចំនួនទៀត ដោយក្នុងរយៈពេលខ្លីលោកក៏ទទួលបានប្រាក់ជំនួយគ្រប់គ្រាន់សម្រាប់វះកាត់ឱ្យប្រពន្ធ។ ជាអកុសល ព្រហ្មលិខិតមិនប្រណី បើទោះជារកប្រាក់បានគ្រប់គ្រាន់ហើយក៏ពិតមែន ប៉ុន្តែជីវិតប្រពន្ធរបស់តារាប្រុសរូបនេះនៅតែមិនអាចសង្គ្រោះបានដដែល៕
