ពួនញុំាទំពាំងបាយជូរ ១២ គ្រាប់នៅម៉ោង ១២ យប់ឆ្លងឆ្នាំ បំណងប្រាថ្នាឆ្នាំបន្ទាប់នឹងបានសម្រេច បើពាក់ឈុតក្នុងពណ៌ក្រហមនឹងជួបគូព្រេង

រាត្រីឆ្លងឆ្នាំ ការហូបផ្លែទំពាំងបាយជូរ ១២ គ្រាប់នៅក្រោមតុ នៅម៉ោង ១២: ០០ ឈានចូលថ្ងៃថ្មីនៃឆ្នាំសកល គេជឿថាវាអាចធ្វើឱ្យបំណងប្រាថ្នានៅឆ្នាំថ្មីក្លាយជាការពិត។ បើតាមការស្រាវជ្រាវ នេះគឺជាប្រពៃណីដែលមានរាប់រយឆ្នាំមកហើយរបស់អេស្ប៉ាញ។

មនុស្សជាច្រើនបាននិយាយថា ដើមកំណើតនៃប្រពៃណីរបស់អេស្ប៉ាញនេះ បានកើតឡើងនៅទ.វ ១៨៩០ និង ១៩០០។ មានភស្តុតាងមួយចំនួនក៏បានលេចឡើងនៅលើកាសែតក្នុងចុងស.វទី ១៩ ផងដែរ ដែលចុះផ្សាយអំពី អ្នកមានលំដាប់ខ្ពស់ មានប្រពៃណីហូបផ្លែទំពាំងបាយជូរនៅថ្ងៃឆ្លងឆ្នាំសម្រាប់ជាអាហារពេលថ្ងៃ។ ដោយឡែក ជនជាតិអេស្ប៉ាញភាគច្រើនបាននិយាយថា ប្រពៃណីនេះកើតឡើងនៅក្នុងទ.វ ១៩០៩ ពេលដែលឈ្មួញមកពីទីក្រុងអាលីកង់ទេ (Alicante) និង ទីក្រុងមូសៀនៃអេស្ប៉ាញ បានប្រគល់ទំពាំងបាយជូរនៅទីលាន Puerta del Sol រាជធានី Madrid ដើម្បីលើកទឹកចិត្ត និង បង្កើតប្រពៃណីនេះ។

បើតាមលោកបណ្ឌិត Daniel Compora សាស្ត្រាចារ្យនៅសាកលវិទ្យាល័យ Toledo ដែលមានជំនាញខាងរឿងព្រេងនិទាន និង វប្បធម៌ដ៏មានប្រជាប្រិយភាព លោកបានលើកឡើងថា ការហូបទំពាំងបាយជូរ ១២ គ្រាប់នៅយប់រំលងចូលថ្ងៃថ្មីនៃឆ្នាំថ្មី គេសន្មតថាវានឹងនាំមកនូវសំណាងល្អសម្រាប់ឆ្នាំថ្មី។ ទំពាំងបាយជូរមួយគ្រាប់ តំណាងឱ្យសំណាងល្អមួយខែ។ ដូច្នេះគេត្រូវហូប ១២ គ្រាប់ដើម្បីបានសំណាង ១២ ខែ ឬពេញមួយឆ្នាំ។​

ទាក់ទងនឹងច្បាប់នៃប្រពៃណីមួយនេះ គេបានកំណត់ច្បាប់អនុវត្ត ២ ជាចម្បង៖ ទី ១ ទំពាំងបាយជូរមួយគ្រាប់តំណាងឱ្យ ១ ខែ អ្នកត្រូវហូបផ្លែទំពាំងបាយជូរតែ ១២ គ្រាប់ប៉ុណ្ណោះ។ ទី ២ អ្នកត្រូវហូបទំពាំងបាយជូរចំនួន ១២ គ្រាប់ឱ្យអស់មុនពេលឈានដល់ម៉ោង ១២ និង ០១ នាទី មានន័យថាអ្នកមានពេលហូបតែមួយនាទីប៉ុណ្ណោះ បើហួសម៉ោង បំណងប្រាថ្នានឹងមិនបានដូចបំណងឡើយ។ មួយវិញទៀត ត្រូវពួនហូបនៅក្រោមតុផងដែរ។

គេជឿថាការដែលហូបទំពាំងបាយជូរនៅក្រោមតុ ជាអត្ថន័យនៃការទាក់ទាញដៃគូស្នេហា ឬមានគូស្នេហ៍ ជាពិសេស អ្នកដែលពាក់ឈុតក្នុងពណ៌ក្រហមអំឡុងពេលហូប។ ហើយពណ៌ក្រហមនេះក៏គេជឿថា វានាំមកទាំងសំណាងល្អ ទាំងលុយកាស និង ស្នេហា។

ចំណែកពណ៌ទំពាំងបាយជូរវិញ បើតាមប្រពៃណី គេអាចហូបទំពាំងបាយជូរពណ៌អ្វីក៏បាន តែគេនិយមប្រើពណ៌បៃតង ព្រោះវាងាយស្រួលរក និង មានរសជាតិផ្អែមជាង។ សម្រាប់ប្រិយមិត្តវិញ តើយល់យ៉ាងណា? គួរសាកល្បងឬអត់?៕

ប្រភព៖ VOGUE