កាលពីថ្ងៃទី ២៤ ខែតុលា ឆ្នាំ ២០២៥ កន្លងទៅ មនុស្សយ៉ាងហោចណាស់ ២០ នាក់បានបាត់បង់ជីវិត ដោយរថយន្តក្រុងមួយគ្រឿងត្រូវឆាបឆេះសន្ធោសន្ធៅ ក្រោយ បុកជាមួយម៉ូតូលើដងផ្លូវចន្លោះក្រុង Bengaluru និង Hyderabad ប្រទេសឥណ្ឌា។
តាមមន្ត្រីរដ្ឋបាលប្រចាំតំបន់ថ្លែងប្រាប់សារព័ត៌មាន ANI ថា រថយន្តក្រុងខាងលើមានមនុស្សជិះសរុប ៤១ នាក់ ដោយក្នុងនោះ មនុស្ស ២១ នាក់ត្រូវបានជួយសង្គ្រោះ។ បច្ចុប្បន្ន សាកសពជនរងគ្រោះ ១១ នាក់ ត្រូវខាងអាជ្ញាធរកំណត់អត្តសញ្ញាណបាន។
គួរឱ្យដឹងថា ឥណ្ឌាគឺជាប្រទេសលំដាប់ទី ៣ លើពិភពលោកមានទីផ្សាររថយន្តធំជាងគេ តែជាមួយគ្នានោះដែរ ប្រទេសនេះក៏ជាប្រទេសមួយក្នុងចំណោមប្រទេសដែលមានអត្រាគ្រោះថ្នាក់ចរាចរណ៍លើដងផ្លូវខ្ពស់ជាងគេបំផុតផងដែរ។ ជាក់ស្ដែង តាមទិន្នន័យបញ្ចេញកាលពីខែមករា កាលពីឆ្នាំមុន ករណីគ្រោះថ្នាក់ចរាចរណ៍លើដងផ្លូវក្នុងប្រទេសឥណ្ឌា មានមនុស្សបាត់បង់ជីវិតដល់ទៅ ១៨ ម៉ឺននាក់៕
