មហាជនធ្លាប់តាមដានទស្សនាក្លីបវីដេអូបែបកំប្លែងៗ ច្បាស់ជាបានស្គាល់ហើយលោក យ៉ូរ៉ូ ដែលតែងតែផលិតវីដេអូនិយាយពាក្យកំប្លែងស្ងួត បង្កជាសំណើចដល់អ្នកទស្សនា។
យ៉ាងណាមិញ មួយរយៈក្រោយនេះ លោក យ៉ូរ៉ូ ក៏បានបាត់មុខក្នុងការផលិតវីដេអូ និង ធ្វើឱ្យមហាជនភ្ញាក់ផ្អើល ក្រោយពីលោកបានបង្ហោះសារកំពុងធ្លាក់ខ្លួនឈឺ។
លោក យ៉ូរ៉ូ រៀបរាប់ថា៖ «ខ្ញុំមិនដឹងថាត្រូវធ្វើយ៉ាងម៉េច ដើម្បីអាចមានលុយទៅមើលជំងឺនៅស្រុកគេ។ ខ្ញុំគិតចង់បែកខួរហើយ ហើយសុខភាពខ្លួនឯងកាន់តែដុនដាបៗទៅពិបាកទ្រាំ»។
លោក យ៉ូរ៉ូ ក៏បានបញ្ជាក់ពីស្ថានភាពជំងឺរបស់លោកនាពេលនេះថា៖ «តម្រងនោមរបស់លោក ដែលហៅថាក្រលៀន វាមានបញ្ហាតែមិនទាន់ខូចនោះទេ ដូច្នេះបងប្អូនកុំយល់ច្រឡំ។ គ្រាន់តែពេលនេះ លោកមានជំងឺបន្ថែមពីលើហ្នឹងទៀត សញ្ញាអកម៉ូនរបស់លោកឡើងខ្ពស់ ឈាមសធ្លាក់ ថ្លើមរលាក ជាតិស្ករឡើង រលាកពោះវៀន បញ្ហាគ្រាប់ឈាមខុសប្រក្រតី និងឈឺក្រលៀនទាំងសងខាង»។
ក្នុងនោះដែរ ស្របពេលកំពុងធ្លាក់ខ្លួនឈឺ និង បានព្យាបាលនៅស្រុកខ្មែររហូតអស់លទ្ធភាពហើយនោះ លោក យ៉ូរ៉ូ ក៏បានខមមិនឆ្លើយតបអ្នកគាំទ្រថា៖ «លោកធ្លាប់តែចេញវីដេអូឱ្យគេសើច តែបើចេញវីដេអូសូមជំនួយគេបងអត់ហ៊ានទេ។ លោកធ្វើឆ្កួតៗឱ្យគេសើចលោកអត់ខ្មាសទេ តែបើលើកដៃយំសុំជំនួយគេ លោកពិតជាខ្មាសខ្លាំង»៕
