បុរសអាយុ ៣៦ ឆ្នាំម្នាក់នៅប្រទេសចិន មានទម្លាប់គ្រប់គ្រងការញ៉ាំអាហារខ្លួនឯងមិនបាន រហូតបណ្ដាលឱ្យខ្លួនឡើងទម្ងន់ជាខ្លាំង។
ខ្វល់ខ្វាយពីរឿងគីឡូខ្លួនឯងនេះហើយ បារម្ភខ្លាចឪពុកម្ដាយសង្សារមិនពេញចិត្ត ស្រាប់តែកាលពីថ្ងៃទី ៣០ ខែកញ្ញា ឆ្នាំ ២០២៥ កន្លងទៅ បុរសខាងលើក៏បានសម្រេចចិត្តទៅវះកាត់ក្រពះ (Bypass) ដើម្បីសម្រកទម្ងន់។ យ៉ាងណាមិញ អ្វីៗមិនដូចការរំពឹងទុក ដោយត្រឹមតែប៉ុន្មានថ្ងៃក្រោយវះកាត់រួច បុរសរូបនោះក៏បានបាត់បង់ជីវិតទៅ។
តាមសារព័ត៌មាន SCMP បានឱ្យដឹងថា បុរសខាងលើមានកម្ពស់ ១.៧៤ ម៉ែត្រ និង ទម្ងន់ជាង ១៣៤ គីឡូក្រាម។ លោកបានទាក់ទងនារីម្នាក់ ហើយទំនាក់ទំនងស្នេហារបស់ពួកគេគឺច្បាស់លាស់រហូតពួកគេរៀបចំចង់ឱ្យចាស់ទុំទាំងសងខាងបានស្គាល់គ្នា។
មុនណាត់ជួបចាស់ទុំ បុរសរូបនេះគឺចង់ស្រកទម្ងន់ ដើម្បីផ្គាប់ចិត្តឪពុកម្ដាយខាងស្រី ក៏ដូចជាចង់ត្រៀមខ្លួនសម្រាប់រៀបការផង។ លោកក៏បានទៅធ្វើការវះកាត់ក្រពះដើម្បីសម្រកទម្ងន់។ ការវះកាត់បានទទួលបានជោគជ័យ ប៉ុន្តែប៉ុន្មានថ្ងៃក្រោយមក ស្ថានភាពរបស់លោកស្រាប់តែអាក្រក់ ហើយក៏ទទួលមរណភាពទៅនៅថ្ងៃទី ០៥ ខែតុលា ឆ្នាំ ២០២៥។
ខាងក្រុមគ្រួសារបានចោទប្រកាន់ទៅលើខាងមន្ទីរពេទ្យ ហើយខាងអាជ្ញាធរសុខាភិបាលក្នុងតំបន់ក៏ស្នើឱ្យមានការធ្វើកោសល្យវិច័យរកមូលហេតុស្លាប់ពិតប្រាកដ។ ជាមួយគ្នានោះដែរ ខាងមន្ទីរពេទ្យក៏បញ្ជាក់ថាពួកគេនឹងទទួលខុសត្រូវចំពោះមុខច្បាប់ ប្រសិនបើការស្រាវជ្រាវរកឃើញថា ពួកគេមានកំហុសពិតមែន៕
