កាលពីថ្ងៃទី ០៩ ខែមករា ឆ្នាំ ២០២៤ កន្លងទៅនេះ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ បានបង្ហាញសេចក្តីប្រកាសព័ត៌មានរបស់អ្នកនាំពាក្យនៃអយ្យការអមសាលាដំបូងរាជធានីភ្នំពេញ ស្តីពី ការចោទប្រកាន់អ្នកបើកបររថយន្តបង្កគ្រោះថ្នាក់ចរាចរណ៍ បណ្តាលឱ្យតារាចម្រៀងរ៉េបម្នាក់ស្លាប់ នៅចំណុចផ្លូវ ៦០ ម៉ែត្រ ខណ្ឌមានជ័យ។
តាមសេចក្តីប្រកាសព័ត៌មានបានឱ្យដឹងថា ផ្អែកតាមការសន្និដ្ឋាន របស់មន្ត្រីនគរបាល ចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញបញ្ជាក់ថា ករណីខាងលើនេះ កើតឡើងដោយសារ អ្នកបើកបររថយន្តបើកបត់ឆ្វេងឆ្លងផ្លូវមិនគោរពសិទ្ធិយានផ្លូវត្រង់ ចំណែកអ្នកបើកបរម៉ូតូបើកបរក្នុងល្បឿនលឿន។
ក្នុងនោះ ក្រោយពីបានសាកសួរ និង ពិនិត្យផ្ទៀតផ្ទាត់ភស្តុតាងក្នុងសំណុំរឿង តំណាងអយ្យការសម្រេចចោទប្រកាន់ លើអ្នកបើកបររថយន្តឈ្មោះ ណឹម ណាង ភេទប្រុស កើតឆ្នាំ ១៩៨៩ (ឃាត់ខ្លួន) ពីបទ «បើកបរបង្កគ្រោះថ្នាក់ ចរាចរណ៍បណ្តាលឱ្យស្លាប់អ្នកដទៃ» តាមបទប្បញ្ញត្តិមាត្រា ៨៥ នៃច្បាប់ស្តីពីចរាចរណ៍ផ្លូវគោក និង បានបញ្ជូនសំណុំរឿងនេះ ទៅចៅក្រមស៊ើបសួរនៃសាលាដំបូងរាជធានីភ្នំពេញ ដើម្បីចាត់ការបន្តតាមនីតិវិធី។
គួររំឭកថា តារាចម្រៀងរ៉េបវ័យក្មេងដ៏ល្បីល្បាញ និង ជាគ្រូបង្វឹកមួយរូបក្នុងកម្មវិធី Rapper Fighter លោក RuthKo បានជួបគ្រោះថ្នាក់ចរាចរណ៍បាត់បង់ជីវិតនៅនឹងកន្លែង នៅម៉ោងប្រមាណជា ១ និង ៤០ នាទីរំលងអធ្រាត្រឈានចូលថ្ងៃទី ៦ ខែមករា ឆ្នាំ ២០២៥ កន្លងទៅនេះ ដោយបច្ចុប្បន្ន ពិធីបូជាសពក៏បានរៀបចំរួចរាល់ រីឯបុណ្យ ៧ ថ្ងៃ របស់តារាចម្រៀងរ៉េបល្បីឈ្មោះ RuthKo នឹងត្រូវប្រារព្ធធ្វើនៅពេលព្រឹកថ្ងៃ ១២ ខែមករា ឆ្នាំ ២០២៥ ខាងមុខនេះ នៅគេហដ្ឋានរបស់សព នៅផ្ទះលេខ ៥១ ផ្លូវ ១៦៨ ភូមិទួលរការ ១ សង្កាត់ចាក់អង្រែក្រោម ខណ្ឌមានជ័យ រាធានីភ្នំពេញ៕
ប្រភព៖ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ
