ថ្មីៗនេះ មានករណីមួយកំពុងផ្ទុះការភ្ញាក់ផ្អើលនៅវៀតណាម ដោយមានហាងនំប៉័ងសាច់មួយត្រូវបានអាជ្ញាធរចុះទៅបិទផ្អាកជាបន្ទាន់ ក្រោយមានករណីមនុស្សចំនួន ៣៤២ នាក់បានពុលបន្ទាប់ពីទទួលទានរួច។
តាមព័ត៌មានបានឱ្យដឹងថា ហាងនំប៉័ងមួយនេះមានឈ្មោះថា Co Ba ស្ថិតនៅលើផ្លូវ Nguyen An Ninh នាទីក្រុងហូជីមិញ ហើយករណីការពុលបានចាប់ផ្តើមតាំងពីថ្ងៃទី ២៦ ខែវិច្ឆិកា ឆ្នាំ ២០២៤ ដោយមានមនុស្សជាច្រើនបានកើតអាការៈឈឺពោះ ក្តៅខ្លួន និងរាករូស ក្រោយពីបានទទួលទាននំប៉័ងសាច់នៅហាងនេះហើយ។ រហូតមកទល់ពេលនេះ ចំនួននៃជនរងគ្រោះក៏បានកើនឡើងរហូតដល់ទៅ ៣៤២ នាក់ទៅហើយ ដោយមានទាំងក្មេង មនុស្សចាស់ និង ស្រ្តីមានផ្ទៃពោះ។
ដោយឡែក ខាងអាជ្ញាធរបានចុះទៅអន្តរាគមន៍ដោយបានធ្វើបិទផ្អាកហាងខាងលើ និងបានរកឃើញថាមានមេរោគដែលបង្កឱ្យមានការពុល គឺមានផ្ទុកនៅក្នុងសាច់ជ្រូក ប៉ាតេ និង បន្លែ។ ចុងក្រោយខាងហាងបានចោទប្រកាន់ពីបទដូចជា ការលក់អាហារដែលបណ្តាលឱ្យមានការពុលដល់មនុស្សលើសពីប្រាំនាក់ ការលក់ដោយគ្មានវិញ្ញាបនបត្រសុវត្ថិភាពចំណីអាហារ អ្នករៀបចំអាហារមិនពាក់ស្រោមដៃ និងបំពាននីតិវិធីសុវត្ថិភាពចំណីអាហារ។ ខាងអាជ្ញាធរបានធ្វើការពិន័យហាងនេះជាទឹកប្រាក់ចំនួន ៤ ៩១០ ដុល្លារ ព្រមទាំងតម្រូវឱ្យម្ចាស់ចេញថ្លៃព្យាបាលទៅលើជនរងគ្រោះផងដែរ៕
ប្រភព៖ VNExpress
